Ministri i Financave, Hekuran Murati, ka dhënë sqarime lidhur me çështjen e pagës së 13-të, pas interesimit të madh nga punonjësit publikë, percjell Infoline News
Në konferencë për media, pas mbledhjes së Qeverisë, Murati bëri të ditur se paga e 13-të u takon atyre punonjësve që kanë marrë pagë për të paktën 12 muaj nga buxheti i shtetit.
Sipas tij, ata që kanë filluar punën gjatë këtij viti dhe nuk i kanë plotësuar 12 muaj, nuk do ta përfitojnë këtë pagesë sivjet, por do të kenë të drejtë vitin e ardhshëm, pasi të plotësojnë kriterin kohor.
“Paga e 13-të parashihet për ata që kanë marrë 12 paga gjatë vitit. Nëse dikush ka nisur punën rishtazi, do ta përfitojë vitin e ardhshëm”, u shpreh Murati.
Ndërkohë, kryeministri Albin Kurti njoftoi se ekzekutimi i pagës së 13-të do të bëhet menjëherë pasi buxheti i këtij viti të miratohet në Kuvend.
Çfarë nënkupton kjo?
• Përfitojnë punonjësit publikë me 12 muaj pune të plotësuara
• Pagesa realizohet pas votimit të buxhetit
• Punonjësit e rinj do ta marrin vitin pasardhës
