Dhoma e Tregtisë dhe Industrisë së Kosovës (DhTIK) ka reaguar ashpër ndaj bllokadës që u është bërë bizneseve nga Agjencia e Regjistrimit Civil dhe Policia e Kosovës, lidhur me regjistrimin e automjeteve.
Përmes një komunikate për media, Dhoma ka njoftuar se ka kërkuar nga Institucioni i Avokatit të Popullit që të nis hetimet mbi këtë praktikë të cilësuar si të padrejtë dhe me pasoja të rënda për ekonominë.
Sipas Dhomës, problemi qëndron tek zbatimi i një paragrafi të Ligjit për Rregullat e Trafikut Rrugor, konkretisht Neni 89, paragrafi 4, i cili, sipas Policisë së Kosovës, ndalon regjistrimin e çdo automjeti të një subjekti juridik nëse ky subjekt ka ndonjë gjobë të papaguar për çfarëdo automjeti tjetër në pronësi të tij.
“Kjo praktikë ka filluar të zbatohet më datë 31.05.2025 nga Policia e Kosovës, me ç’rast bizneset që kanë gjoba të papaguara, nuk po mund t’i regjistrojnë veturat e tyre pa i paguar të gjitha gjobat, pavarësisht se cili automjet është ndëshkuar, dhe kjo po ndikon në funksionimin normal të bizneseve, qarkullimin ekonomik dhe të drejtën për ushtrim të veprimtarisë së tyre,”, thuhet në komunikatë.
Dhoma ka theksuar se zbatimi i këtij neni është në kundërshtim me Kushtetutën e Kosovës, duke i mohuar pronarëve të drejtën për të shfrytëzuar pronën e tyre.
“DhTIK vlerëson se me këto veprime është shkelur Neni 46, paragrafi 1 i Kushtetutës së Kosovës, i cili përcakton se e drejta e pronës është e drejtë e garantuar. Pra, zbatimi i Ligjit nr. 08/L-186 për Rregullat e Trafikut Rrugor, Neni 89, paragrafi 4, i pamundëson pronarit të pronës, qasjen dhe shfrytëzimin e pronës, duke e bllokuar dhe pamundësuar shfrytëzimin e pronës së tij,”, thuhet më tej.
