Këngëtarja shqiptaro-britanike Rita Ora do të ngjitet në skenë për një koncert më 11 korrik në Brooklyn Bridge Park të New Yorkut, në kuadër të ngjarjes “The Hill in New York” – një organizim treditor që i kushtohet finales së kampionatit prestigjioz të Wimbledonit.
Ngjarja do të zgjasë nga 11 deri më 13 korrik dhe organizohet nga Klubi i Tenisit “All England Lawn Tennis Club”, që për herë të parë sjell atmosferën e Wimbledonit në zemër të New Yorkut.
Në park do të vendoset një ekran gjigant për transmetimin e finaleve, ndërsa ambienti do të imitojë një “kopsht anglez”, me elemente tradicionale si luleshtrydhe me krem, scone të sapopjekura dhe peshk me patate të skuqura.
Kulmi i natës hapëse do të jetë koncerti i Rita Orës, përpara rreth 5,000 pjesëmarrësve. Hyrja do të fillojë nga ora 18:00 dhe do të lejohet vetëm për ata që kanë siguruar bileta.
