Presidentja e vendit, Vjosa Osmani ka zbuluar pak nga shija e saj e botës kulturore dhe frymëzuese, duke përmendur disa libra, filma dhe këngë që i lënë përshtypje.
Në këtë periudhë festive ajo ekskluzivisht për klankosova.tv, veçoi librin autobiografik “Educated” nga Tara Westover, teksa në fushën e kinemasë, Osmani theksoi filmin “The Six Triple Eight”.
Sa i përket muzikës, presidentja shtoi se bashkë me vajzat dëgjon këngë frymëzuese si “Rise Up” nga Andra Day dhe “Girls” nga Rachel Platten, të cilat i shërbejnë si mesazhe fuqizuese për gratë dhe vajzat.
Në këtë periudhë festive, cili është libri, filmi ose kënga që ju frymëzon më shumë?
”Një libër që më ka lënë mbresa së fundi është “Educated” nga Tara Ëestover. Ky është një rrëfim autobiografik i fuqishëm për jetën e autores, e cila u rrit në një familje të izoluar në Idaho, pa arsimim formal dhe nën një regjim të ashpër kontrolli familjar. Ajo rrëfen udhëtimin e saj të jashtëzakonshëm për arsimim, duke thyer barrierat e vendosura nga familja dhe duke përfunduar doktoraturën në Universitetin e Kembrixhit. Ky libër është i jashtëzakonshëm, sepse frymëzon lexuesit ta vlerësojnë fuqinë e arsimit dhe të kuptojnë sa e rëndësishme është të gjesh kurajën për të ndjekur ëndrrat, pavarësisht pengesave”.
”Filmi që kam parë së fundmi dhe më ka lënë përshtypje është The Six Triple Eight. Ky film tregon historinë e jashtëzakonshme të batalionit 6888, një njësi e përbërë nga gra të guximshme, të gjitha me ngjyrë, që shërbyen gjatë Luftës së Dytë Botërore. Ajo që e bën këtë film të veçantë për mua është mënyra se si sjell në jetë një pjesë të historisë që shpesh është lënë në hije – sakrificën e këtyre grave për të përmbushur një mision të pamundur, duke përballuar diskriminimin dhe kushtet e vështira. Mesazhi i tij për forcën, guximin dhe rëndësinë e solidaritetit në kohë të sfidave është tejet frymëzues dhe universal. Është vështirë të gjej kohë për filma por po shpresoj që gjatë festave të gjej mundësi ta shoh sezonën e dytë të serialit “The Diplomat”’.
”Përsa i përket muzikës, këto ditë, së bashku me vajzat dëgjojmë më shumë muzikë festash”.
”Një këngë që e dëgjoj shpesh është “Rise Up” nga Andra Day, sepse në përgjithësi më pëlqejnë këngët frymëzuese (përfshirë kur ato janë siç “soundtracks” të filmave të mirënjohur). Poashtu, e dëgjoj shpesh këngën “Girls” nga Rachel Platen, sepse është mesazh i një nëne për vajzat e saj, që ka për synim fuqizimin e tyre, pavarësisht sfidat e jetës. Dëgjojmë shumë edhe muzikë të vjetër shqipe e këngë që kanë lënë gjurmë. Këto burime frymëzimi ma kujtojnë forcën dhe potencialin që kemi të gjithë për të krijuar ndryshime pozitive, si individualisht ashtu edhe kolektivisht”.
