Aktori Dardan Gashi ka rrëfyer një ngjarje ku tregon se familja e tij është ofenduar rëndë nga një person i panjohur në sheshin “Zahir Pajaziti” në Prishtinë, në ditën e programit të 28 Nëntorit të djalit të tij.
Sipas Gashit, djali i tij 9-vjeçar kishte performuar në programin festiv shkollor, i veshur me simbole kombëtare, duke kënduar këngën “Mora fjalë”. Ai thotë se momenti ishte me emocionues për të gjithë familjen.
“I veshur me pantallona të zinjë dhe me bluzën me shqiponjën dykrenare në gjoks, ai shkëlqeu në skenë bashkë me shoqet dhe shokët e klasës. Na emocionuan të gjithëve – mua, bashkëshorten dhe fëmijët”, shkruan aktori.
Por sipas tij, vetëm pak më vonë, gëzimi u kthye në një përjetim të rëndë. Gashi thotë se në shesh, djali i tij pa dashur preku këmbën e një burri rreth të 30-ave, gjë që sipas tij u pasua me ofendime të rënda nga ai burrë ndaj bashkëshortes së tij, të cilën ai thotë se e quajti “të mbuluar”.
“Një prekje e pafajshme e një fëmije 9-vjeçar… dhe kjo mjaftoi që ky tip i sëmurë nga islamofobia të shpërthente në ofendime ndaj një nënë me dy fëmijë të vegjël”, deklaron Gashi.
Ai shton se personi ka përdorur shprehje të rënda dhe fyerje fetare:
“‘Juve duhet me ja sh* edhe Muhamedit edhe Jezusit’, i tha ai, kur pa që po injorohej.**”
Aktorit, sipas këtij rrëfimi, i ka telefonuar vetë djali i tronditur për t’i treguar ngjarjen. Ai thotë se falënderon Zotin që nuk ka qenë vetë aty, duke lënë të kuptohet se reagimi i tij mund të kishte përshkallëzuar situatën.
“Falenderoj Allahun që nuk e kam takuar unë përballë. Sot lajmet ndoshta do të raportonin për një Dardan që as familja, as shoqëria nuk e kishte njohur ‘ashtu’”, shkruan ai.
Postimi i plotë:
Skandal në një ditë gëzimi
Sot djali im 9-vjeçar pati programin shkollor për 28 Nëntorin. I veshur me pantallona të zinjë dhe me bluzën me shqiponjën dykrenare në gjoks, ai shkëlqeu në skenë bashkë me shoqet dhe shokët e klasës duke kënduar “Mora fjalë”. Na emocionuan të gjithëve – mua, bashkëshorten dhe fëmijët.
Pas programit, bashkëshortja mori fëmijët dhe shkoi te takohej me motrën e saj në sheshin “Zahir Pajaziti”. Nili, i emocionuar e i gëzuar, duke ecur në shesh preku lehtë këmbën e një djali rreth të 30-ave. Një prekje e pafajshme e një fëmije 9-vjeçar, i shoqëruar me nënën e tij të mbuluar… dhe kjo mjaftoi që ky tip i sëmurë nga islamofobia të shpërthente në ofendime ndaj një nënë me dy fëmijë të vegjël.
E shau, e ofendoi në mënyrën më banale. Dhe kur pa që po injorohej, ai vazhdoi me fyerje që s’kanë vend në asnjë shoqëri: “Juve duhet me ja sh*** edhe Muhamedit edhe Jezusit.”
I befasuar dhe i tronditur, Nili mori telefonin e nënës dhe më thirri për të treguar çfarë kishte ndodhur.
Falenderoj Allahun që nuk e kam takuar unë përballë. Sot lajmet ndoshta do të raportonin për një Dardan që as familja, as shoqëria, as kush nuk e kishte njohur “ashtu”. I mbushur me mllef vendosa të shprehem publikisht.
Ky tip është produkt i narrativave të atyre gerrgjylave të moshuar të “Lëvizjes së Deçanit” dhe pseudo-profesorëve si Blerim Latifi, që ushqejnë kokat bosh me urrejtje ndaj muslimanëve. Por duhet ta kuptojnë një gjë: çdo mllef ka një kufi. E kur shperthen, le ta dinë këta islamofobë që, vallahi, në damarët tanë qarkullon gjaku i Shaban Polluzhës e Azem Galicës.
Një betim po ua bëj: nuk kam krenari më të madhe sesa me e mbrojt nderin dhe familjen time, me çdo çmim.
