Sindikata e Bashkuar e Arsimit, Shkencës dhe Kulturës (SBAShK) ka kërkuar nga Ministria e Arsimit, në bashkëpunim me Drejtoritë Komunale të Arsimit dhe prindërit, që të krijohet një platformë në nivel kombëtar për të adresuar sfidat e sektorit të arsimit, duke u përqendruar veçanërisht në rrezikun e mbylljes së shkollave për shkak të largimit të nxënësve.
Kryetari i SBAShK-ut, Rrahman Jashari, në një intervistë për Ekonomia Online, ka theksuar se gjendja në arsimin e Kosovës është problematike për dy arsye kryesore: ulja e natalitetit dhe largimi i qytetarëve, sidomos të rinjve, drejt vendeve të BE-së për një jetë më të mirë.
Ai ka shtuar se në viset rurale po vërehen tendenca për mbylljen e shkollave, duke bërë të nevojshëm një angazhim më të madh për të siguruar që punonjësit e arsimit të mos mbeten pa vende pune.
“E kemi një gjendje të keqe në sektorin e arsimit, për dy momente, për shkak të natalitetit vazhdon të ulët në Kosovë, por edhe për shkak të ikjeve, gjegjësisht shkuarjeve në vendet e tjera për një jetë më të mirë dhe kjo ka prekur edhe sistemin arsimor. Në gjatë viti të kaluar shkollor jemi marr më këtë çështje dhe kishim informacione të cilat mund t’i quaj jo të verifikuara se po shtohet numri i atyre që largohen, kam fjalën kërkesat që ishin për pushim sipas ligjit një vit pa pagës dhe ne kishim frikë se këta njerëzit tanë e marrin këtë pushim shkojnë dhe e provojnë fatin jashtë dhe nëse atje stabilizohen nuk kthehen do të edhe kishim frikën sidomos për kuadrat që i quajmë të lëndëve shkencore, teknologjisë, matematikës dhe lendeve të tjera”.
