Konfuzioni gjeografik i Presidentit të SHBA-së, Donald Trump, ishte objekt shakaje midis liderëve botërorë në një samit të enjten.
Kryeministri i Shqipërisë, Edi Rama, u filmua duke u tallur me bashkë me Presidentin Francez, Emmanuel Macron dhe Presidentin e Azerbajxhanit, Ilham Aliyev, në takimin e Komunitetit Politik Europian në Kopenhagë të enjten.
“Duhet të na kërkoni falje… sepse nuk na përgëzuat për marrëveshjen e paqes që Presidenti Trump bëri midis Shqipërisë dhe Azerbajxhanit”, i tha Rama Macronit, duke bërë që Aliyev të shpërthente në të qeshura.
“Më vjen keq për këtë”, bëri shaka Macron, ka shkruar Politico, transmeton Gazeta Express.
Trump e ka ngatërruar vazhdimisht Armeninë dhe Shqipërinë kur flet për përpjekjet e tij për të zgjidhur tensionet e gjata midis Armenisë dhe Azerbajxhanit.
“Unë zgjidha luftëra që ishin të pazgjidhshme. Azerbajxhani dhe Shqipëria, po vazhdonin për shumë, shumë vite, kisha kryeministrat dhe presidentët në zyrën time”, tha ai gjatë një paraqitjeje në Fox Neës muajin e kaluar.
Dhe gjatë një konference të përbashkët për shtyp me Kryeministrin Britanik, Keir Starmer, Trump tha: “Ne zgjidhëm [konfliktin mes] Aberbaixhanit dhe Shqipërisë”, duke e sakatuar emrin e një vendi të Kaukazit të Jugut dhe duke e ngatërruar plotësisht tjetrin.
Që të jemi të qartë: Trump ndërmjetësoi një marrëveshje midis udhëheqësve të Armenisë dhe Azerbajxhanit në Shtëpinë e Bardhë në gusht, me të dy vendet që u zotuan të përfundonin dekada luftimesh dhe të zgjeronin lidhjet me Uashingtonin. Udhëheqësi republikan e përshëndeti paktin si një fitore të madhe diplomatike, duke vënë në pah kredencialet e tij ndërsa bën fushatë për Çmimin Nobel për Paqen.
Ai ka pretenduar vazhdimisht se ka përfunduar shtatë luftëra që kur u kthye në detyrë këtë vit duke vepruar si ndërmjetës – diçka që Associated Press e ka verifikuar si të rreme. Ndër konfliktet që Trump ka pretenduar se i ka zgjidhur janë luftërat midis Serbisë dhe Kosovës dhe Egjiptit dhe Etiopisë. Ndërsa ka tensione midis këtyre vendeve, ato nuk kanë hyrë në luftë kohët e fundit.
India, nga ana e saj, ka hedhur poshtë pretendimin e Shtëpisë së Bardhë se Trump kontribuoi në uljen e tensioneve me Pakistanin në maj.
Ngatërrimi Armeni–Shqipëri nuk është rasti i parë që tregon mungesën e njohurive të sakta gjeografike nga ana e Trumpit.
Ai dikur ngatërroi Hungarinë dhe Turqinë gjatë fushatës zgjedhore në vitin 2023, duke iu referuar kryeministrit hungarez Viktor Orbán si “udhëheqësi i Turqisë” dhe duke thënë se vendi i tij ka një “front” me Rusinë. (As Turqia dhe as Hungaria nuk kanë një kufi tokësor me Rusinë).
Dhe përpara një samiti me Presidentin rus Vladimir Putin në gusht, Trump tha: “Ne do të shkojmë në Rusi. Do të jetë një çështje e madhe”. Samiti u zhvillua në Alaska, një shtet i SHBA-së.
