Deputeti i Partisë Demokratike të Kosovës, Altin Krasniqi, ka ndarë një rrëfim të thellë dhe personal lidhur me përvojat e babait të tij, Jakup Krasniqi, i cili ka kaluar më shumë se një dekadë e gjysmë të jetës në burgje, përfshirë edhe periudhën aktuale në paraburgim në Hagë.
Gjatë një interviste, Altini foli për sakrificat e familjes së tij, me theks të veçantë mbi përkushtimin e babait ndaj kauzës së lirisë dhe pavarësisë së Kosovës.
Ai kujtoi se në vitin 1981, Jakup Krasniqi – i cili më vonë do të bëhej zëdhënës i Ushtrisë Çlirimtare të Kosovës – ishte dënuar fillimisht me 14 vjet burgim nga autoritetet jugosllave.
Më pas, në një aktgjykim të dytë, dënimi iu rrit në 15 vjet, për shkak të deklaratës së tij të hapur: “Unë nuk jam jugosllav, jam shqiptar.”
Nga ajo periudhë, Krasniqi vuajti 10 vjet, 3 muaj e 18 ditë dënim në qelitë e atëhershme.
Altin Krasniqi theksoi se babai i tij ka kaluar tashmë 15 vjet gjithsej në burgje – përfshirë edhe kohën që po kalon aktualisht në paraburgim në Hagë që nga nëntori i vitit 2020, ku po gjykohet nga Dhomat e Specializuara të Kosovës.
“Për të, më e lehtë ka qenë të pranojë burgun e Jugosllavisë, sepse e ka ditur që po kundërshtonte një sistem shtypës dhe po luftonte për lirinë e popullit të vet”, u shpreh Altini, duke shtuar se vuajtja është më e rëndë kur ajo vjen nga një sistem që vetë është ndërtuar mbi sakrificën për liri dhe drejtësi.
Ai gjithashtu potencoi se përgjegjësia për krimet e luftës dhe gjenocidin në Kosovë është e qartë dhe duhet të adresohet: “Dihet mirë se kush ka kryer krime dhe gjenocid në Kosovë – është Serbia.”
Kujtojmë se Jakup Krasniqi, përveçse pjesë e strukturave politike dhe ushtarake të UÇK-së, ka mbajtur poste të larta shtetërore pas luftës, përfshirë edhe detyrën e Kryetarit të Kuvendit të Kosovës.
