Një 26 vjeçare u lëndua dje në kokë si pasojë e gjuajtjes së trenit me gurë.
Ngjarja ka ndodhur në Grabovc të Obiliqit, derisa treni ishte në lëvizje.
Pas këtij incidenti ka reaguar ashpër edhe kompania Trainkos.
Trainkos këtë rasti e cilëson si një akt “të papërgjegjshëm dhe të rrezikshëm” që përbën kërcënim serioz për jetën e udhëtarëve.
“Ky akt i papërgjegjshëm dhe i rrezikshëm përbën një kërcënim serioz për sigurinë e pasagjerëve dhe stafit tonë, si dhe për integritetin e shërbimeve tona hekurudhore.
Trainkos dënon fuqishëm çdo formë dhune ndaj trenave dhe udhëtarëve dhe thekson se siguria e pasagjerëve dhe e stafit mbetet prioriteti i saj kryesor. Po ashtu, Trainkos është zotuar për bashkëpunim të ngushtë me autoritetet që autorët e këtij akti të dalin para drejtësisë.
Ndër të tjera në reagim, bëhet apel publik ndaj qytetarëve, duke kërkuar që të jenë vigjilentë dhe të raportojnë çdo veprim të dyshimtë apo të rrezikshëm në afërsi të linjave hekurudhore.
“NDALO MENJËHERË! Hedhja e gurëve ndaj trenave RREZIKON JETË!. Këto veprime nuk janë vetëm të papërgjegjshme dhe të paligjshme, por përbëjnë rrezik serioz për jetën dhe shëndetin e pasagjerëve, stafit hekurudhor dhe gjithë pjesëmarrësve në këtë shërbim publik”, thuhet mes tjerash në reagimin e Trainkos.
