Pas zhvillimeve të fundit lidhur me vrasjen e rreshterit të policisë, Muhamed Lika, nga Kaçaniku, dhe arrestimin e shtatë personave të dyshuar për përfshirje në këtë akt të rëndë kriminal, ka reaguar edhe babai i Rejan Belës, njërit prej të arrestuarve.
Ai ka shprehur shqetësimin për mënyrën se si rasti po trajtohet nga disa media, analistë dhe opinionistë, të cilët ai i akuzon për marrjen e rolit të gjyqtarëve dhe prokurorëve.
“Jam jashtëzakonisht i tronditur nga disa gazetarë, analistë dhe individë që po marrin rolin e gjyqtarit apo të prokurorit,” ka thënë ai, duke shtuar se trajtimi i tillë është i padrejtë dhe i dëmshëm për të gjithë të përfshirët dhe për familjet e tyre.
Ai ka deklaruar se dy djemtë e tij janë ndaluar dhe po mbahen në paraburgim prej një muaji, me vendim të Gjykatës, si të dyshuar për përfshirje në vrasjen e rreshterit Lika.
Sipas tij, familja është e bindur për pafajësinë e tyre dhe është e gatshme të presë vendimin e drejtësisë.
“Ne, si familje, e dimë të vërtetën dhe presim lirimin e tyre. Le të dalë drejtësia në shesh. Kemi besim se e vërteta do të triumfojë dhe se çdo gjë do të zbardhet me kohë,” tha ai.
Ngjarja tronditëse, e cila ndodhi më 1 prill 2025, ka shkaktuar një reagim të gjerë nga opinioni publik, ndërkohë që hetimet po vazhdojnë nga organet kompetente.
Deri tani, janë arrestuar shtatë persona të dyshuar për përfshirje në vrasjen e rreshterit Muhamed Lika, duke përfshirë edhe dyshimet për planifikimin dhe ekzekutimin e aktit.
Prokuroria Themelore në Ferizaj ka kërkuar paraburgim prej një muaji për gjashtë nga të arrestuarit, ndërkohë që hetimet po zhvillohen me intensitet për zbardhjen e plotë të ngjarjes. /insajderi
