Kryeministri i Shqipërisë, Edi Rama, gjatë fjalës së tij në seancën e përbashkët të Kuvendit të Kosovës dhe Kuvendit të Shqipërisë, ka komentuar rolin e ish-krerëve të Ushtrisë Çlirimtare të Kosovës (UÇK) dhe zhvillimet aktuale në Kosovë.
Ai përmendi rëndësinë e UÇK-së dhe veprimtarëve të saj, duke vënë në dukje se pa ta, fati i Kosovës në hyrje të këtij shekulli do të kishte qenë ndryshe.
“…Po ku janë sot përfaqësuesit e UÇK-së që Rexhep Qosja i kërkonte me patjetër në atë udhëtim historik, pa Hashim Thaçin dhe shokët e tij, që udhëtuan së bashku me Ibrahim Rugovën, Rexhep Qosjën dhe të tjerët për të takuar historinë e re të shqiptarëve në këto bjeshkë? Ne nuk e dimë sot çfarë rruge do të kishte marrë fati i Kosovës në hyrje të këtij shekulli. Por, çka dimë me siguri është se ato çaste vendimmarrëse të mëdha nuk do të kishin ardhur dot ashtu siç erdhën, dhe e sotmja me shumë gjasë do t’i ngjante shumë më tepër të shkuarës sesa të ardhmes pa UÇK-në, me në krye Hashim Thaçin.”
Rama tha se pavarësisht këtyre arritjeve historike, liderët e UÇK-së, si Hashim Thaçi, Jakup Krasniqi, Kadri Veseli dhe Rexhep Selimi, janë mbajtur peng për gati pesë vjet në një proces gjyqësor që ka shkaktuar zhgënjim të madh për mungesën e virtyteve të drejtësisë.
“Por sot, që ne jemi të gjithë këtu në Kuvendin që shpalli dhe firmosi Pavarësinë e Kosovës, Hashim Thaçi, Jakup Krasniqi, Kadri Veseli dhe Rexhep Selimi vazhdojnë të mbahen peng prej gati 5 vjetësh në qelitë e një drejtësie kombëtare që në çdo hap ka zhgënjyer këdo që ka pritur prej saj virtytet e drejtësisë së një shteti të së drejtës.”
“Unë as nuk e kam diskutuar ndonjëherë dhe nuk e diskutoj as sot, të drejtën e asaj Gjykate Speciale për të bërë punën që ia ka ngarkuar edhe vendimmarrja e kësaj salle, ku vetë Hashimi ka ngritur dorën për t’u formuar ajo gjykatë, por ajo që unë nuk mund ta bëj, është të vij këtu në Prishtinë, të marrë fjalën dhe pastaj ta gëlltit në heshtje në këtë foltore, para jush, në mungesë të Hashimit, Jakupit, Kadriut dhe Rexhepit. Kjo është një nyje e mbledhur në fyt nga një dyshim shumë i madh dhe krejt i arsyeshëm, për fat të keq, se ai proces është proces i parregullt ligjor dhe se normat dhe standardet e tij janë nën standardin e drejtësisë së të gjitha vendeve demokratike që e financojnë atë gjykatë.”
Rama e quajti procesin e Gjykatës Speciale si një proces të parregullt dhe nën standardet e drejtësisë ndërkombëtare, duke kërkuar që Kuvendi i Kosovës të ndërmarrë hapa për të kërkuar shqetësimin e forcave politike shqiptare ndaj standardeve të këtij procesi.
“Unë nuk mund të rri pa ua thënë vëllazërisht, për habinë time, se ky Kuvend nuk ka ndërmarrë asnjëherë iniciativë për të kërkuar, përmes një rezolute të mbështetur nga të gjitha forcat politike, të paktën nga partitë shqiptare, shqetësimin e madh mbi standardet e atij procesi, për të kërkuar ngritjen e një komisioni verifikimi për këtë shqetësim. Gjykata është e pavaru, por standardet nuk janë të varura nga gjykatësit. Ndoshta ky shqetësim mund të mos qendrojë, por nëse qëndron, atëherë kjo është një çështje më e madhe. Jo për ata katër njerëz të thjeshtë, as vetëm për Kosovën, por edhe për vetë integritetin e Republikës ndërkombëtare, të cilës kjo Republikë përmes përfaqësuesve të saj ia dha në mirëbesim gjykimin e historisë që lindi Republikën, dhe prandaj nuk mund të lihet, sipas meje, në heshtje shurdhuese që ushqehet nga gjithfarë motivesh, nga fisnikët dhe politikanët.”
Ai u shpreh i gatshëm që edhe Shqipëria përkatësisht, partia e tij ta votojë një rezolutë që kërkon llogari nga Gjykata Speciale.
