Një zyrtar policie në New Jersey tha se u trondit kur në mbrëmjen e 8 dhjetorit pa me sytë e tij skena aq të habitshme sa u detyrua t’i njoftonte shërbimet e urgjencës. Ai u shpreh se i pa të paktën 50 dronë me madhësinë e makinave që fluturonin mbi oqean dhe me shpejtësi të madhe po i afroheshin vijës bregdetare, ka raportuar BBC-ja.
Në vendin e ngjarjes kishte mbërritur zyrtari policor Michael Mastronady, që tha se pa dronët.
“Ne po kërkojmë disa përgjigje të arsyeshme, në mënyrë që njerëzit të mund të vazhdojnë jetën e tyre dhe të mos jetojnë në këtë histeri që po kalojmë”, është shprehur ai.
Që nga mesi i nëntorit, banorët dhe autoritetet lokale kanë raportuar rregullisht se dronë të shumtë po fluturojnë pranë vijës bregdetare, pranë pikave kryesore të infrastrukturës amerikane ose afër bazave ushtarake amerikane.
Megjithatë, autoritetet amerikane kanë theksuar se s‘ besojnë që këta dronë përbëjnë rrezik për sigurinë kombëtare në SHBA. Qytetari Noel Thomas ka thënë se pa një dron në formë trekëndëshi me tri drita vezulluese me ngjyra të ndryshme, që fluturonin mbi një termocentral.
Ai menjëherë lajmëroi policinë, e cili tha se ka marrë raporte të ngjashme për fluturimin e dronëve.
Sipas Thomas, droni kishte madhësinë e një autobusi në ajër. Raportet e tilla kanë mbërritur deri në FBI, ku po zhvillohen hetime. Por, fluturimin e dronëve s’po e sheh si diçka të re Komanda Veriore e SHBA-së. Ajo tha se ka regjistruar mbi 600 inkursione të ngjashme në hapësirën ajrore që nga 2022-s.
Nga Këshilli i Sigurisë Kombëtare të Shteteve të Bashkuara është thënë se janë regjistruar miliona dronë që fluturonin në qiell.
“Është e vështirë të identifikosh një objekt në qiell, veçanërisht gjatë natës me një aparat fotografik ose pajisje optike. Duhet të jeni në gjendje të zbuloni sinjalet e radios, të përdorura për të fluturuar në distancë me dronin ose radarin që është optimizuar për të gjurmuar këto objekte të vogla, fluturuese dhe të ngadalta”, thuhet në reagimin e Programit të Mbrojtjes në Qendrën për një Siguri të Re në SHBA.
Drejtuesit lokalë të zonave në New Jersey kanë kërkuar shpjegime nga autoritetet qendrore për dronët.
Ata thanë se po pranojnë informacione dhe shqetësime nga banorët lidhur me dronët.
