Një ngjarje tragjike i mori jetën 27-vjeçares shqiptare Adela Xhaferri mbrëmjen e 6 dhjetorit në zonën e Brescias në Itali.
E reja u përplas nga një automjet teksa ndodhej në anë të rrugës, pak pasi kishte shpëtuar nga një tjetër aksident.
Adela po udhëtonte si pasagjere në makinën e drejtuar nga partneri i saj, kur mjeti rrëshqiti dhe doli nga rruga. Pas aksidentit të parë, ajo arriti të dalë nga makina pa lëndime serioze, por ndërsa ndodhej jashtë mjetit, një tjetër automjet e goditi, duke i shkaktuar vdekjen e menjëhershme.
Adela sapo kishte përfunduar turnin e saj të punës në një pastiçeri në Brescia dhe po udhëtonte me të dashurin drejt shtëpisë së tij në Rovato, një udhëtim prej rreth 30 minutash. Në afërsi të kryqëzimit me autostradën A-35, makina e tyre rrëshqiti dhe u rrotullua në anë të rrugës.
Ndërsa dy të rinjtë shpëtuan pa dëmtime nga aksidenti i parë, një automjet tjetër përplasi Adelën disa minuta më vonë. Partneri i saj kërkoi ndihmë menjëherë, por fatkeqësisht shërbimet mjekësore nuk arritën ta shpëtojnë 27-vjeçaren.
Policia po vijon të hetojë detajet e ngjarjes, ndërsa shoferët e përfshirë iu nënshtruan analizave të alkoolit, të cilat treguan se të dy ishin brenda normave të lejuara. Ngjarja ka tronditur komunitetin lokal, ku Adela njihej si një vajzë e përkushtuar dhe punëtore.
Një humbje e madhe për familjen e saj, që tani përballet me dhimbjen e papërshkrueshme të kësaj tragjedie.
