Gripi është sëmundje që mund të shkaktojë simptoma të tilla si dhimbje fyti, hundë të bllokuara, temperaturë, dhimbje të trupit dhe lodhje.
Për shumicën e njerëzve, sistemi imunitar mund të bëjë që trupi ta kalojë gripin brenda një jave.
Por për disa individë, gripi mund të shkaktojë sëmundje të rënda, shtrirje në spital ose edhe vdekje.
Sipas Qendrës për Kontrollin dhe Parandalimin e Sëmundjeve (CDC), çdo vit, gripi shkakton deri në 710,000 hospitalizime dhe 51,000 vdekje në SHBA, ka shkruar The New York Times.
Analizat e fundit të CDC-së, që shqyrtuan hospitalizimet nga gripi nga viti 2010 deri në 2023, treguan faktorët që i bëjnë njerëzit më të rrezikuar për pasoja të rënda shëndetësore nga gripi.
- Mosha: Fëmijët e vegjël dhe të moshuarit janë ata që shpesh përjetojnë hospitalizime të rënda për shkak të gripit, pasi sistemi i tyre imunitar është më i dobët. Sipas CDC-së, “gripi i tipit A ka shkaktuar më shumë hospitalizime”, sidomos kur virusi H3N2, një lloj i tipit A, është më i përhapur dhe prek më shumë të moshuarit.
- Sëmundjet neurologjike: Fëmijët me probleme si epilepsia, paraliza cerebrale dhe ADHD mund të kenë probleme me funksionin e mushkërive dhe muskujve, duke e bërë më të vështirë pastrimin e rrugëve të frymëmarrjes dhe duke rënduar simptomat e gripit, që mund të çojnë në pneumoni.
- Sëmundjet e mushkërive: Gripi mund të shkaktojë sulme astme te fëmijët, duke rënduar inflamacionin e rrugëve të frymëmarrjes. Po ashtu, te të rriturit me sëmundje pulmonare kronike, gripi mund ta bëjë më të vështirë pastrimin e infeksionit dhe të shkaktojë më shumë inflamacion.
- Gratë shtatzëna: Gratë shtatzëna janë gjithashtu në rrezik më të madh për komplikime nga gripi, për shkak të ndryshimeve hormonale që mund të rëndojnë sistemin imunitar, si dhe për shkak të mundësisë së ndikimit negativ te fëmija.
- Mbipesha dhe sëmundjet metabolike: Mbipesha është faktor rreziku për të gjitha grupmoshat. “Pesha e tepërt mund ta bëjë më të vështirë pastrimin nga infeksioni”, ka thënë doktori William Schaffner, specialist në sëmundje infektive në Universitetin e Vanderbilt.
Mbipesha shpesh është e lidhur me sëmundje si diabeti dhe tensioni i lartë i gjakut, që gjithashtu mund ta rëndojnë gripin. - Sëmundjet e zemrës: Doktoresha, Sadiya Khan, kardiologe në Northwestern Medicine, shpjegon se “gripi ia bën zemrës më të vështirë për t’u përballur me stresin që sjell infeksioni”.
Rreth gjysma e pacientëve të hospitalizuar nga gripi kanë sëmundje të zemrës, dhe gripi mund të rrisë rrezikun për infarkt dhe goditje në tru. - Tensioni i lartë i gjakut: Një e katërta e pacientëve të hospitalizuar me grip në dy sezonet e fundit në SHBA kanë pasur tension të lartë. Tensioni i lartë mund të dëmtojë arteriet dhe ta bëjë zemrën më të dobët për ta përballuar infeksionit.
- Statusi i vaksinimit: Vaksina e gripit ka treguar se ul ndjeshëm rrezikun e hospitalizimit. Studimet tregojnë se vaksinimi mund të ulë shkallën e hospitalizimeve deri në 34.5% për fëmijët dhe të rriturit. Megjithatë, vaksinimi është në rënie në SHBA, ku më pak se gjysma e popullsisë mori vaksinën vitin e kaluar.
“Vaksina nuk është një mrekulli, por është më pak e mundshme që ju të keni nevojë për hospitalizim”, ka thënë Schaffner.
Zyrtarët e CDC-së kanë deklaruar se “pacientët me ngjyrë kanë pasur shkallën më të lartë të hospitalizimeve”, me pacientët me origjinë amerikane të zezë dhe vendas që kanë pasur shkallë 1.5 deri 3.5 herë më të lartë të shtrimit në spital sesa pacientët e bardhë.
Sipas New York Times, edhe nëse jeni vaksinuar, është e rëndësishme të monitoroni simptomat, veçanërisht nëse keni vështirësi me frymëmarrjen ose dhimbje gjoksi.
Për çdo simptomë të gripit që nuk kalon pas një jave, ekspertët rekomandojnë të kërkoni kujdes mjekësor.