Qeveria e Kosovës sot ka miratuar vendimin për industrinë e kinematografisë në vend në të drejtën për rabat. Kjo do të jetë një mundësi e mirë për kompanitë e huaja filmike, që do të rimbursohen në 30% të shpenzimeve.
“Nga sot fillon një etapë e re për industrinë e kinematografisë në vend. Në mbledhjen e sotme të Qeverisë së Republikës së Kosovës kemi miratuar rregulloren për të drejtën në rabat, instrument që synon të tërheqë investime të huaja në Kosovë.
Kompanitë e huaja filmike do të kenë mundësinë që të xhirojnë projektet e tyre filmike në territorin e Kosovës, për të cilin investim do të rimbursohen 30% të shpenzimeve të pranueshme që i kanë harxhuar në bizneset, shërbimet, e burimet njerëzore vendore. Po i njëjti instrument aplikohet edhe për kompanitë që zhvillojnë videolojëra.
Kosova do të bëhet destinacion kryesor për prodhimtari filmike në rajon, duke qenë se talenti dhe përvoja e dëshmuar veçse është e pranishme dhe e gatshme për të ngritur industrinë tonë në nivele ende më të larta. Me rabatin nuk synojmë vetëm mbështetje, por investim direkt në talentin kreativ vendor. E në të njëjtën kohë, është edhe ftesë për botën që të vijnë e të krijojmë së bashku në Kosovën tonë.
Urime gjithë komunitetit të kineastëve dhe ju priftë e mbara në bashkëpunimet që do të vijojnë”, shkruan Kurti në njoftim./
