Në skaj të Moskës, diçka e pazakontë po ndodh.
Një grup grash po kritikojnë publikisht autoritetet ruse. Burrat e tyre janë në mesin e 300,000 rezervistëve të mobilizuar nga presidenti rus Vladimir Putin për luftën në Ukrainë në vjeshtën e vitit 2022.
Dhe ata i duan në shtëpi, raporton BBC.
“Kur do të konsiderohet se burrat tanë e kanë kryer detyrën e tyre ushtarake?” pyet Maria. “Kur ata kthehen pa krahë dhe këmbë? Kur nuk mund të bëjnë asgjë? Apo duhet të presim që të kthehen në arkivole zinku?”.
Gratë u takuan përmes rrjeteve sociale dhe kanë formuar një grup të quajtur “The Ëay Home”. Ato kanë pikëpamje të ndryshme për luftën. Disa pretendojnë se e mbështesin atë. Të tjerë janë skeptikë për “operacionin special ushtarak” të Kremlinit. Ajo që duket se i bashkon është besimi se burrat kanë bërë pjesën e tyre që është dashur në luftime dhe duhet të kthehen në shtëpi me familjet e tyre.
Është një mendim që autoritetet nuk e ndajnë.
Në Rusi, kritika publike për çdo gjë që lidhet me luftën vjen me një rrezik. Shumica e folësve i zgjedhin fjalët e tyre me shumë kujdes. Ata e dinë se ka një varg ligjesh në fuqi tani në Rusi për ndëshkimin e mospajtimit. Megjithatë, zhgënjimi i tyre është i dukshëm.
“Si fillim, ne i besuam qeverisë tonë,” thotë Antonina. “Por a duhet t’u besojmë atyre tani? Unë nuk i besoj askujt”.
Anëtaret e grupit dolën atje për të ndarë historitë e tyre me një këshilltar lokal, Boris Nadezhdin. Ai ka qenë kritik ndaj “operacionit special ushtarak” që në fillim.
Çuditërisht, Nadezhdin është një nga kritikët e paktë të qeverisë që është lejuar të dalë televizionin kombëtar që nga pushtimi i plotë i Ukrainës nga Rusia.
