Indeksonline ka raportuar mbrëmë lidhur me një rast të neglizhencës ndaj një pacienti, i cili brenda një dite është endur sa në Prishtinë e sa në Ferizaj, pasi asnjëri spital i këtyre dy qyteteve nuk po i operonte këmbën e infektuar.
Djali i pacientit ka rrëfyer për Indeksonline se babai i tij, që ka sëmundjen e diabetit dhe këmbën e infektuar, brenda ditës katër herë ka udhëtuar Ferizaj-QKUK-Ferizaj-QKUK për të gjetur trajtim shëndetësor.
Ai ka thënë se neglizhenca e madhe e të dy spitaleve përveç se i ka lodhur, njëherazi edhe e ka rënduar gjendjen shëndetësore të të atit.
“Prindin më thanë me çu në Prishtinë. Atje më thanë që s’ka vend se janë tu i renovu sallat e operimit. E ktheva në Ferizaj e aty më thanë se operimi duhet me u kry veç në Prishtinë. E çova në Prishtinë e prapë na kthynë. Më shkoi dita tu e endë prindin. Prindi e ka gjendjen e rëndë, këmba i është infektu për shkak të sëmundjes, i është ënjtur e po tutemi se mos infeksioni ja infekton edhe gjakun” ka deklaruar ai.
Lidhur me këtë ka reaguar edhe Shërbimi Spitalor i Klinikës Universitare të Kosovës, duke thënë se ka inicuar hulumtimin e rastit dhe nëse vërtetohen pretendimet e pacientit, do të ndërmerren masa.
“Lidhur me shkrimin me titull “S’e operon as spitali i Ferizajt as QKUK, djali tregon neglizhencën që i’u bë babait të tij”, të publikuar mbrëmë në Indeksonline, Shërbimi Spitalor dhe Klinik Universitar i Kosovës(ShSKUK), njofton se ka inicuar hulumtimin e rastit dhe në rast se vërtetohet se ka pasur neglizhencë dhe mos trajtim të rastit nga profesionistët shëndetësorë të Spitalit të Përgjithshëm në Ferizaj, apo në QKUK, atëherë do të ndërmerren masat e parapara, konform legjislacionit në fuqi.
Njëkohësisht, ShSKUK, i’u bënë thirrje të gjithë qytetarëve që ankesat për mos trajtim të duhur t’i drejtojnë tek komisioni për trajtim të ankesave dhe shqetësimit të pacientëve në ShSKUK” thuhet në njoftimin e ShSKUK.
