Donald Trump ka mundur Kamala Harris në garën presidenciale të vitit 2024, duke shënuar një rikthim historik në Shtëpinë e Bardhë, pas humbjes në zgjedhjet e mbajtura në vitin 2020.
Ai është bërë presidenti i dytë në histori që fiton me mandate jo të njëpasnjëshme, pasi siguroi 270 votat elektorale të nevojshme, sipas shifrave të publikuara nga mediat amerikane.
Trump, i cili shërbeu si president midis 2017 dhe 2021, ishte i pari që mori një shtet të lëkundur pasi u shpall fitues i Karolinës së Veriut. Më pas, ai u shpall fitues i Georgias, shteti i dytë kyç në zgjedhje.
Më vonë, ai u projektua si fituesi i Pensilvanisë,shteti më i rëndësishëm nga shtatë shtetet e fushëbetejës. Trump foli nga Palm Beach duke shpallur fitoren e parakohshme ndërsa votat ishin në favor të tij.
“Kjo ishte një lëvizje që askush nuk e ka parë më parë. Sinqerisht, unë besoj se kjo ishte lëvizja më e madhe politike e të gjitha kohërave.”, u shpreh Trump duke shtuar se po vjen epoka e artë për Amerikën.
Zgjedhja e Trump vjen disa muaj pasi i mbijetoi dy atentateve ndaj tij.
