Administrata e Presidentit të Shteteve të Bashkuara, Donald Trump, ka njoftuar vendosjen e një tarife prej 17 për qind për domatet e freskëta nga Meksika, duke e hequr një marrëveshje 30-vjeçare që e përjashtonte këtë produkt nga detyrimet “antidumping”.
Tërheqja nga marrëveshja nga ana e administratës Trump u bë të hënën, ndërsa po afrohej afati që Meksika të arrijë një marrëveshje gjithëpërfshirëse tregtare me SHBA-në deri më 1 gusht, përndryshe do të përballet me një tarifë të përgjithshme prej 30 për qind për mallrat e saj.
“Meksika mbetet një nga aleatët tanë më të mëdhenj, por për një kohë shumë të gjatë, fermerët tanë janë shtypur nga praktikat e padrejta tregtare që dëmtojnë çmimet e produkteve bujqësore si domatet,” tha Sekretari Amerikan i Tregtisë, Howard Lutnick, në një deklaratë.
