Një tregtare e ‘dark web’-it që kishte fituar dhjetëra mijëra euro nga shitja e muzikës së vjedhur dhe të papublikuar nga artistë të njohur, përfshirë artistë si: Coldplay, Shawn Mendes dhe Bebe Rexha, i ka shpëtuar burgut.
Skylar Dalziel, 22 vjeçe, ka aksesuar mijëra këngë të mbrojtura me të drejta autoriale, duke fituar 42,000 funte (50,584 euro) midis prillit 2021 dhe janarit 2023, sipas policisë së Londrës.
Ajo ka siguruar këngët duke hyrë ilegalisht në llogaritë e ruajtjes në cloud të lidhura me artistët në fjalë, sipas njoftimit të policisë, shkruan DailyMail.
Policia ka bastisur shtëpinë e saj në Luton pas një informacioni nga industria e regjistrimit dhe analizimi i hard disqeve të kompjuterit ka zbuluar se ajo kishte akses në 290,000 këngë nga artistë të tillë si: Coldplay, Shawn Mendes, Melanie Martinez, Upsahl dhe Bebe Rexha.
Dalziel ka transferuar paratë që fitoi në llogari bankare në ShBA dhe oficerët po punojnë me Departamentin e Sigurisë Kombëtare për të identifikuar individët që janë të lidhur me këto llogari.
Të premten, tregtarja e ‘dark web’-it është dënuar me 21 muaj burg në Gjykatën e Kurorës në Luton, dënim i pezulluar për 24 muaj, pasi u shpall fajtore për nëntë shkelje të të drejtave të autorit dhe katër shkelje të përdorimit të paautorizuar të kompjuterëve, dhe gjithashtu u urdhërua të kryejë 180 orë punë të pabesuara.
