Data 15 tetor e vitit hyn në historikun e marrëdhënieve të Shqipërisë me Brukselin si moment kur asaj mundësohet nisja e shqyrtimit të grup kapitujve të parë, për çështjet themelore.
Një rrugë e gjatë kjo që nisi me nënshkrimin në vitin 1991, kohë kur Shqipëria vendosi marrëdhëniet diplomatike me komunitetin evropian.
Pas 15 vjetësh po më 12 qershor të vitit 2006 Shqipëria arriti të nënshkruajë Marrëveshjen e Stabilizim-Asociimit me BE-në.
BE-ja është në këto tri dekada donatori më i madh financiar i Shqipërisë.
U deshen tre vjet që më 28 prill të vitit 2009 në Pragë gjatë presidencës çeke Shqipëria të aplikonte për statusin e vendit kandidat për anëtarësim në BE.
Ndërkohë në muajin dhjetor të vitit 2010 u materializua edhe liberalizimi i vizave për shqiptarët në zonën Shengen.
Pas pesë vjetësh pritje më 24 qershor 2014 Shqipëria do të merrte statusin e vendit kandidat për në BE. Anëtarësimi i Shqipërisë dhe vendeve të Ballkanit Perëndimor është ndikuar ndjeshëm edhe nga dinamikat e zhvillimeve në gjirin e vetë Bashkimit Evropian.
