Edhe ndryshimet më të vogla në këmbë mund të jenë sinjal i një problemi të madh shëndetësor, paralajmërojnë ekspertët. Mpirja, thonjtë që trashen apo këmbët e ftohta nuk duhet injoruar – sepse mund të jenë simptomë e sëmundjes së arteries periferike, një gjendje e rrezikshme që rrit mundësinë për atak në zemër dhe goditje në tru.
Kirurgët vaskularë thonë se këmbët janë shpesh të parat që tregojnë shenja të arteriosklerozës, një bllokim i enëve të gjakut që ndikon jo vetëm në qarkullimin, por edhe në shëndetin e përgjithshëm të zemrës.
Një simptomë tipike është “klaudikacioni intermitent” – dhimbja në këmbë gjatë ecjes që zhduket me pushim. Nëse keni ndjesi djegieje, shpimi gjilpërash, lëkurë të thatë apo plagë që nuk shërohen, mund të jetë koha për të bërë kontrolle.
Ndërkohë, mjekët paralajmërojnë edhe për rrezikun e diabetit të tipit 2, i cili mund të dëmtojë nervat dhe enët e gjakut, duke rritur rrezikun për infeksione dhe plagë kronike në këmbë.
Sipas ekspertëve, monitorimi i shëndetit të këmbëve nuk është vetëm estetik – por shpesh jetik për të parandaluar pasoja të rënda.
