Presidenti i Shteteve të Bashkuara të Amerikës, Donald Trump gjatë fjalimit të tij në Kongres pati një moment emocionues me një djalë minoren, i cili prej gjashtë vitesh është diagnostikuar me kancer në tru.
Gjatë fjalës, Trump e emëroi atë si agjent të Shërbimit Sekret, një ëndërr që djaloshi e kishte prej kohësh. Shefi i Shtëpisë së Bardhë u shpreh se Daniel u diagnostikua me kancer në tru në vitin 2018 dhe mjekët i kishin dhënë vetëm pesë muaj jetë.
“Ne do të të bëjmë nderin më të madh nga të gjithë. Po i kërkoj drejtorit të Shërbimit Sekret, Sean Curran, që zyrtarisht të të bëjë (Daniel) një agjent të Shërbimit Sekret të Shteteve të Bashkuara”, thekson ai.
Të pranishmit shpërthyen në duartrokitje, ndërsa Daniel dukej plotësisht i habitur. Ai më pas përqafohet dhe mbulohet me dashuri nga njerëzit përreth tij.
Trump u shpreh se ulja e shkallës së kancerit te fëmijët dhe studimi i rasteve të autizmit në SHBA do të jetë një përparësi kryesore për sekretarin e tij të shëndetësisë, Robert F. Kennedy Jr. Çdo vit në SHBA rreth 15,000 fëmijë diagnostikohen me këtë sëmundje.
