Të kesh një çip në trurin tënd që mund t’i përkthejë mendimet në komanda kompjuterike mund të tingëllojë si fantashkencë – por është një realitet për Noland Arbaugh.
Në janar 2024 – tetë vjet pasi u paralizua – 30-vjeçari u bë personi i parë që mori një pajisje të tillë nga firma amerikane e neuroteknologjisë, Neuralink, shkruan BBC.
Nuk ishte çipi i parë i tillë – një pjesë e vogël e kompanive të tjera i kanë zhvilluar dhe implantuar gjithashtu. Por Noland thotë se gjëja e rëndësishme nuk është as ai, as Musk – por shkenca.
Ai i tha BBC-së se i dinte rreziqet e asaj që po bënte, por “mirë apo keq, çfarëdo që të jetë, do të ndihmonte”.
“Nëse gjithçka funksiononte, atëherë unë mund të ndihmoja të jem pjesëmarrës i Neuralink. Nëse do të ndodhte diçka e tmerrshme, e dija se ata do të mësonin prej saj”, tha ai.
Noland, i cili është nga Arizona, u paralizua poshtë shpatullave në një aksident zhytjeje në vitin 2016.
Lëndimet e tij ishin aq të rënda sa kishte frikë se mund të mos ishte në gjendje të studionte, të punonte apo edhe të luante lojëra përsëri.
Çipi Neuralink duket se rikthen një pjesë të pavarësisë së tij të mëparshme, duke e lejuar atë të kontrollojë një kompjuter me mendjen e tij.
