Erdajt Sopjani, një 17-vjeçar nga Kosova, ka shpikur një pajisje revolucionare që mund të lexojë aktivitetin e trurit dhe të interpretojë preferencat dhe ndjenjat e individëve.
Ai fitoi vendin e parë në një garë të madhe në Austri, ku morën pjesë rreth 300 pjesëmarrës.
Erdajti shpjegoi se aplikacioni i tij ka aftësinë të lexojë trurin dhe të sugjerojë “pushimet e jetës”, duke analizuar se si ndihen njerëzit dhe sa janë të interesuar për një aktivitet të caktuar.
Ai ka arritur të ndajë aktivitetet e trurit në dy pjesë, të majtën dhe të djathtën, dhe ka krijuar një algoritëm që i interpreton ato.
“Formula që kam krijuar tregon se sa mirë ndihesh dhe sa i interesuar është truri juaj për diçka. Kur i shikon numrat, mund të duken të pakuptimta, por është e nevojshme të kuptosh formulën dhe të krijosh lidhjen vetë”, shpjegoi Erdajti.
Ai theksoi se ky sistem mund të përdoret në shumë fusha, megjithatë, për të realizuar një projekt të tillë, kërkohet një investim i madh.
“Kur juria teknike e pa aplikacionin, ata e vlerësuan shumë dhe ishin të impresionuar nga ajo që kishim arritur”, tha Erdajti në një intervistë për “ABC e Mëngjesit”.
