Agjentët e Shërbimit Sekret në Shtetet e Bashkuara e kanë tërhequr ish-presidentin amerikan Donald Trump nga skena në një tubim të Partisë Republikane në Pennsylvania, pasi aty u dëgjuan disa krisma.
Pamjet kanë shfaqur Trumpin duke u ulur shpejt në tokë, para se agjentët ta largonin me nxitim.
Nuk është bërë e qartë se çka ka ndodhur, por është parë edhe gjak në fytyrën e Trumpit.
Ekipi i fushatës i Trumpit ka thënë në një deklaratë për “The Guardian” se ish-presidenti është mirë dhe po trajtohet në një qendër mjekësore.
Edhe Shërbimi Sekret ka thënë se Trumpi është i sigurt. Ky institucion ka bërë të ditur se menjëherë ka nisur hetimet dhe sapo të ketë informata, ato do të bëhen publike.
Kandidati republikan për president ishte duke iu adresuar përkrahësve në Pennsylvania – një prej shteteve kyçe për zgjedhjet e nëntorit.
https://www.c-span.org/video/?536813-1/president-donald-trump-campaigns-butler-pa
