Bypassi gastrik është ndërhyrje kirurgjike që ndihmon njerëzit të humbin peshë duke ndryshuar mënyrën se si stomaku dhe zorrët trajtojnë ushqimin. Pas operacionit, stomaku do të jetë më i vogël. Kjo gjë krijon ndjesinë e të qenit të ngopur me më pak ushqim.
Për shkak të kësaj, trupi nuk do të marrë më të gjitha kaloritë nga ushqimi që konsumohet, raporton MedlinePlus.
Dy hapat që duhen bërë gjatë operacionit “gastrik bypass”
Hapi i parë e bën stomakun më të vogël. Kirurgu ndanë stomakun në dy pjesë, sipër një pjesë të vogël dhe poshtë një pjesë më të madhe. Pjesa e sipërme e stomakut e quajtur qese është vendi ku do të shkojë ushqimi që hyn në trup. Ky vend është afërsisht sa madhësia e një arre dhe mban vetëm 28 gram ushqim. Për shkak të kësaj personi që bën këtë ndërhyrje do të hajë më pak dhe do të humbë peshë.
Hapi i dytë është anashkalimi. Kirurgu lidh një pjesë të zorrës të vogël me një vrimë të vogël në qeskën e stomakut. Ushqimi që konsumohet tani do të udhëtojë nga qeska në zgavrën e re dhe në zorrën e vogël poshtë vendit ku normalisht do të shkonte, duke anashkaluar kështu një pjesë të zorrës së vogël. Si rezultat, trupi do të absorbojë më pak kalori.
Anashkalimi gastrik mund të bëhet në dy mënyra, atë klasike duke hapur barkun dhe mënyra e dytë bëhet me anë të laparoskopisë ku në brendësi të barkut vendoset kamera përmes së cilës kirurgu sheh dhe punon duke mos e hapur barkun në tërësi.
Pse kryhet kjo procedurë
Kjo kirurgji bëhet nëse dikush ka mbipeshë e nuk mund të dobësohet përmes dietave e ushtrimeve.
Ofruesit e kujdesit shëndetësor shpesh përdorin indeksin e masës trupore dhe sëmundjet si diabeti i tipit 2 (diabeti që fillon në moshën madhore) dhe tensioni i lartë i gjakut për të përcaktuar se cilët njerëz kanë më shumë gjasa të përfitojnë nga ndërhyrja.
Kjo kirurgji nuk është zgjidhje e shpejtë për mbipeshën. Kjo do të ndryshojë shumë stilin e jetesës. Pas këtij operacioni, duhet të konsumohen ushqime të shëndetshme, të kontrollohet sasia e ushqimit që konsumohet si dhe të bëhen ushtrime. Nëse nuk ndiqen këto masa, mund të ketë komplikime nga operacioni dhe humbje të paktë të peshës.
