Ish-stjuardesa Barbara Bacilieri, e cila u bë e njohur si YouTuber (Barbie Bac), ka ndarë një informacion mjaft të dobishëm sa i përket udhëtimeve, sidomos gjatë verës.
“Linjat ajrore nuk do t’jua tregojnë gjithmonë këtë, por ekziston një kod veshjeje i fshehur. Nëse e shkelni atë, mund t’ju mohohet hipja në bord, të vonoheni në kontrollet e sigurisë ose, edhe më keq, të rrezikoni një emergjencë.”
Mund të mos e kishit menduar, por bëhet fjalë për këpucët me takë të lartë.
“Taket e larta mund të shpojnë rrëshqitësen e evakuimit të aeroplanit “, theksoi 29-vjeçarja, duke shpjeguar se evakuimi në një rast të tillë do të shndërrohej në një makth.
Por ka edhe të tjera veshje, të cilat do të jenë të parehatshme në rast urgjence, siç janë fustanet e shkurtra, fundet dhe pantallonat e shkurtra.
“Po, mund të duken bukur në Instagram, por në rast evakuimi ato çojnë në djegie (nga fërkimi) apo gërvishtje.”
Ish-stjuardesa shprehet se duhet të përfytyrojmë veten duke zbritur në rrëshqitësen e fryrë me lëkurën e ekspozuar.
“Është e dhimbshme dhe e rrezikshme”, shtoi ajo.
Gjithashtu nuk rekomandohet të vishni geta, pasi janë të bëra nga materiale që digjen shumë shpejt. Prandaj, në rast zjarri në aeroplan, “ato mund të shkrihen në lëkurë dhe të shkaktojnë djegie serioze”.
Pra, çfarë duhet të veshim para se të nisemi për në aeroport? Bacilieri rekomandon atlete të rehatshme, pantallona të gjata dhe një xhaketë/bluzë të lehtë.
