Ikona e muzikës botërore nuk është në qendër të vëmendjes vetëm për muzikën e saj, por edhe për stilin e veshjes, atë të jetës, trendet që përcjell në çdo dalje publike, ndaj kur ajo jep intervista për media të ndryshme të gjithë janë sy e veshë.
Këtë herë, Beyonce foli për një aspekt që nuk e ka prekur shumë në jetën e saj, le të themi për një vendim të rëndësishëm që duket se pasoi me shumë të tjerë më pas.
Në një intervistë për „Essence“, artistja foli për fiksimin e saj për flokët, sidomos pas u bë nënë. Nuk e dimë nëse e kujtoni modelin pixie të këngëtares në vitin 2013-të, një model që i shokoi jo pak njerëzit.
“Më kujtohet dita kur vendosa të shkurtoja flokët,” u shpreh Beyonce. “Nuk kisha një stil të veçantë në mendje. Nuk ishte një zgjedhje estetike, por një transformim dhe metamorfozë shumë e madhe emocionale që po kaloja. Identiteti im si artiste lidhej shumë me flokët asokohe, por vendimi për t’i prerë erdhi edhe si një formë rebelimi kundër asaj që shoqëria më kishte projektuar në atë kohë,” vijoi Beyonce.
Ajo vazhdoi duke thënë se: “Unë isha një nënë e re dhe diçka në lidhje me çlirimin nga kjo ndjesi më bëri që të hiqja dorë nga flokët e gjatë. Mora gërshërët dhe thjesht i preva. Ishte gjithçka e qëllimshme dhe menjëherë pas këtij veprimi mora guxim për shumë vendime të tjera që e çuan jetën dhe karrierën time në nivelet që është sot,” përfundon këngëtarja.
Me sa duket, Beyonce është një nga ne kur vjen puna te ndryshimet që i ndodhin grave pas lindjes së fëmijëve, e kemi fjalën jo vetëm për ato fizike, por edhe emocionale që çojnë kësisoj drejt vendime të befasishme në raport me pamjen e jashtme dhe jo vetëm.
