Këngëtari dhe fituesi i Big Brother VIP Albania 2, Luiz Ejlli, ka ndarë me ndjekësit e tij një dedikim mjaft emocional në këtë 24 dhjetor.
Përmes një postimi në rrjetet sociale, ai ka shprehur peshën që mban zemra e tij në këtë natë festash, duke kujtuar humbjet dhe bekimin më të madh të jetës së tij.
Pesë vite pa të atin
Luizi ka nisur mesazhin e tij me kujtimin e dhimbshëm për babanë e tij, i cili është ndarë nga jeta pesë vite më parë. “Mungesa e tij s’plaket kurrë,” shkroi ai, duke shtuar se në çdo dritë Krishtlindjesh i mungon zëri i të atit.
Takimi me Kiarën dhe ardhja e Lunës
Më tej, ai ka kujtuar rrugëtimin e tij trevjeçar me Kiara Titon, duke e cilësuar takimin me të si një “shpëtim të heshtur” në një moment kur ai ndihej i thyer. Mirënjohja e tij kulmon me vajzën e tyre, Lunan, të cilën e quan dritën e vogël që mposhti çdo dhimbje dhe arsyen pse shpresa e tij nuk shuhet kurrë.
Formati që i ndryshoi jetën
Luizi nuk ka lënë pa përmendur edhe hyrjen e tij në formatin Big Brother VIP, që i ndryshoi rrjedhën e jetës, duke e parë atë si një derë që e rriti, e provoi dhe e rindërtoi nga rrënjët.
“Nuk po festoj, po ndjej”
Në mbyllje të këtij reflektimi, këngëtari ka treguar se nata e sotme është e mbushur me lot, dashni dhe falënderim. Ai e ka mbyllur mesazhin e tij me një urim për të gjithë ata që festojnë, por edhe për ata që jetojnë përgjithmonë vetëm në zemrat e njerëzve të tyre. /Prive
