Llogaria zyrtare e presidentit ka shpërndarë fotot nga “Situation Room”: Trump, me kapelën “Make America Great Again” në kokë, ishte i rrethuar nga zëvendëspresidenti Vance, shefi i Pentagonit, Sekretari i Shtetit dhe këshilltarët kryesorë.
Pesë presidentë janë përballur me këtë vendim – nëse do të përdornin apo jo forcën ushtarake kundër Iranit: Bill Clinton, George W. Bush, Barack Obama, Joe Biden dhe Donald Trump. Donald Trump është i vetmi president që në fund ka vendosur të ndërmarrë një veprim ushtarak, dhe kjo – sido që të shkojnë gjërat në ditët në vijim – do të jetë pjesë thelbësore e trashëgimisë së tij politike.
Imazhet e shkrepura në “Situation Room” gjatë sulmit ndaj Iranit, ashtu si fotot e Barack Obamës në maj 2011 kur ndoqi sulmin ndaj kompleksit të Osama bin Ladenit, apo si George W. Bush që në 2003 dha urdhrin për fillimin e luftës në Irak, do të mbeten në histori.
Ndryshe nga hera kur Trump urdhëroi sulmin për të vrarë Qassem Soleimanin, dorën e djathtë të udhëheqësit suprem Ali Khamenei, këtë herë presidenti mbante kapelën e kuqe “Make America Great Again”.
Fotot, të publikuara nga Shtëpia e Bardhë, ofrojnë një mundësi të rrallë për të hyrë në atë moment në dhomën e vendimmarrjes – të njohur edhe si “salla JFK”, sepse u ndërtua gjatë presidencës së John F. Kennedy.
Në një nga fotot, Donald Trump, i rrethuar nga ministrat e tij, shikon i patrazuar përpara, duke ndjekur në një ekran misionin kundër tri objekteve iraniane të pasurimit të uraniumit. Trump nuk është gjithnjë ulur: në një tjetër foto ai është në këmbë, pranë shefit të shtabit, Dan Caine, i cili po i thotë diçka Susie Wiles-it, shefes së Kabinetit të Shtëpisë së Bardhë.
