Kompania gjigante e teknologjisë, Microsoft, ka njoftuar se do të shkurtojë 3 përqind të fuqisë së saj globale punëtore, si pjesë e një ristrukturimi që përfshin edhe reduktimin e niveleve menaxheriale brenda organizatës.
Shkurtimet pritet të prekin ekipe të ndryshme, në të gjitha nivelet dhe në degë të shumta të kompanisë në mbarë botën.
Në një deklaratë për media, kompania bëri të ditur se këto masa janë të domosdoshme dhe pasojnë një valë të mëparshme largimesh nga puna në vitin 2023, kur rreth 10 mijë punonjës u shkarkuan.
“Microsoft dhe kompani të tjera të mëdha po përballen me sfida në një klimë ekonomike të paqartë, të ndikuar nga tarifat tregtare të vendosura nga Shtetet e Bashkuara,” thuhet më tej në deklaratë.
Largimet masive nga puna janë bërë të zakonshme vitet e fundit, teksa korporatat shumëkombëshe po rishikojnë kapacitetet e tyre reale të punës pas një periudhe punësimesh të shtuara gjatë pandemisë globale.
