Ndërsa pamja fizike dhe aroma mund të ndikojnë në përshtypjen e parë për dikë, ato nuk janë faktorët vendimtarë në dashuri.
Një studim i fundit tregon se inteligjenca është një nga cilësitë më të vlerësuara në zgjedhjen e një partneri romantik: rreth 80% e pjesëmarrësve thanë se ajo është “thelbësore” ose “shumë e rëndësishme”, ndërsa 89% u shprehën se do të pranonin me dëshirë një lidhje me dikë që është dukshëm më i arsimuar ose më inteligjent.
Por pse jemi kaq të tërhequr nga inteligjenca, pavarësisht gjinisë?
Ekspertët shpjegojnë se ajo lidhet shpesh me tipare tërheqëse si sensi i humorit, kreativiteti, aftësitë sociale dhe zgjidhja e problemeve. Gjithashtu, inteligjenca ofron një avantazh evolucionar të mundshëm: të ardhura më të larta dhe stabilitet më i madh.
Megjithatë, ekspertët theksojnë se, përtej inteligjencës, faktorë të tjerë ndikojnë në zhvillimin e një marrëdhënieje, si koha, vlerat e përbashkëta dhe kimia hormonale. Psikologët kanë identifikuar katër hormone që luajnë rol kyç në tërheqjen romantike: dopamina, serotonina, testosteroni dhe estrogjeni.
Për shembull, njerëzit me nivele të larta të dopaminës priren të jenë më aventurierë, spontanë dhe krijues – çka i bën ata më të përputhshëm me njëri-tjetrin.
Ndërkohë, çiftet me dominancë të serotoninës janë më të rezervuar, tradicionalë dhe të përqendruar në rregull dhe disiplinë.
Ekspertët gjithashtu hedhin poshtë mitin se “të kundërtat tërhiqen”, duke argumentuar se zakonisht dashuria lind mes njerëzve me status të ngjashëm socio-ekonomik, vlera të përbashkëta kulturore ose fetare dhe objektiva të njëjtë në jetë./ TAR
