Një portret i mrekullueshëm i një djali të ri palestinez, i cili humbi të dy duart në një sulm ajror izraelit në qytetin e Gazës, është shpallur fotoja më e mirë e “World Press Photo”.
Fotografja Samar Abu Elouf, e cila është gjithashtu nga Gaza, u takua me nëntë-vjeçarin Mahmoud Ajjour tre muaj pasi një shpërthim i këputi njërin nga krahët dhe ia gjymtoi tjetrin. Ajjour dhe familja e tij u evakuuan në Doha, Katar, ku ndodhet Abu Elouf, për të marrë trajtim mjekësor.
“Një nga gjërat më të vështira që ma shpjegoi nëna e Mahmudit ishte se si, kur Mahmudi e kuptoi për herë të parë se i ishin prerë krahët, fjalia e parë që ai i tha ishte: ‘Si do të jem në gjendje të të përqafoj?’”, shkroi Abu Elouf në shënimet e saj shoqëruese mbi imazhin, i cili ishte shkrepur dhe publikuar në “The New York Times”, raporton CNN, transmeton Klankosova.tv.
Fotoja është një kujtesë e ashpër e kostove afatgjata të luftës në Gaza, e cila ka vrarë dhjetëra mijëra dhe ka çuar në shkatërrim dhe zhvendosje të gjerë të banorëve të saj. Zyra e OKB-së për Koordinimin e Çështjeve Humanitare vlerëson se rreth gjysma e të vrarëve janë gra dhe fëmijë.
Sulmi i vazhdueshëm i Izraelit në Gaza u shkaktua nga tërbimi vdekjeprurës i 7 tetorit nga militantët e Hamasit.
“Kjo është një foto e qetë që flet me zë të lartë. Tregon historinë e një djali, por edhe të një lufte më të gjerë që do të ketë ndikim për brezat”, tha Joumana El Zein Khoury, drejtore ekzekutive e “World Press Photo”, në një deklaratë për shtyp.
Kontrasti në foton fituese – dritë dhe errësirë, bukuri dhe dhimbje – tërhoqi vëmendjen e gjyqtarëve, tha Lucy Conticello, drejtore e fotografisë për revistën M të “Le Monde” dhe një nga gjyqtarët.
Fotoja fituese u zgjodh nga afro 60,000 aplikime të paraqitura nga 3,778 fotografë në më shumë se 140 vende.
