Duke gjykuar nga disa prej titujve të sotëm në Rusi, Moska beson se telefonata e fundit mes presidentëve Putin dhe Trump shkoi mirë – të paktën për Kremlinin.
“Telefonatë rekord e gjatë mes Putin dhe Trump”, shkruanKomsomolskaya Pravda. Faqja e gazetës shton: “Siç qëndrojnë gjërat, Rusia ka shënuar një fitore diplomatike këtu”.
Pse disa në Rusi po e quajnë këtë telefonatë dy-orëshe “fitore”?
Përgjigja ndoshta qëndron te fakti se, deri në fund të saj, Vladimir Putin nuk ishte vënë nën presion për të bërë ndonjë lëshim të madh ndaj Ukrainës apo Shteteve të Bashkuara. Përkundrazi, ai – në thelb – e refuzoi idenë e Presidentit Trump për një armëpushim të menjëhershëm dhe të pakushtëzuar 30-ditor, shkruan BBC.
Jo vetëm që Moska nuk e pranoi një armëpushim të pakushtëzuar, por Putin vendosi edhe kushtet e tij për paqen.
Ato përfshijnë ndalimin e ndihmës ushtarake perëndimore për Kyivin dhe ndarjen e inteligjencës me ukrainasit, si dhe ndalimin e mobilizimit në Ukrainë. Këto kushte shihen gjerësisht si një mënyrë për të siguruar dorëzimin e Ukrainës.
Është e vështirë të imagjinohet që Kyivi ta pranojë ndonjë nga këto kushte. Por, a mund të ndodhë që administrata e Trump-it të bindet eventualisht nga Moska se këto kushte janë të pranueshme?
