Presidenti i Shteteve të Bashkuara, Donald Trump, do të vendosë 25 për qind tarifë ndaj importeve nga Kanadaja dhe Meksika, dhe 10 për qind tarifë ndaj mallrave nga Kina nga kjo e shtunë, njoftoi Shtëpia e Bardhë të premten.
Trumpi ka kohë që kërcënon me vendosjen e tarifave për të siguruar bashkëpunim më të madh nga këto vende për parandalimin e imigracionit të jashtëligjshëm dhe kontrabandës me kimikate të përdorura për fentanil.
Ai është zotuar gjithashtu se do t’i përdorë tarifat për ta rritur prodhimin vendës dhe për t’i shtuar të hyrat për qeverinë federale.
“Duke filluar nga nesër (deklaratë e bërë të premten, shën.red.), këto tarifa do të hyjnë në fuqi”, u tha gazetarëve të premten zëdhënësja e Shtëpisë së Bardhë, Karoline Leavitt.
“Këto janë premtime të bëra dhe të mbajtura nga presidenti”, shtoi ajo.
Tarifat sjellin si rreziqe politike ashtu edhe ekonomike për Trumpin, i cili e mori mandatin e tij të dytë para vetëm dy javëve, raporton REL.
Shumë votues e mbështetën Trumpin pas premtimit të tij për ta ulur inflacionin, por tarifat mund të çojnë në rritje të çmimeve dhe t’i prishin sektorët e energjisë, automjeteve, drurit dhe bujqësisë, raporton Associated Press.
Trump kishte thënë se po shqyrtonte përjashtime për importet e naftës nga Kanadaja dhe Meksika, por Leavitt tha se nuk ka informacion për një vendim të mundshëm të presidentit mbi përjashtimet.
