Në kuadër të diskutimeve për politikën e emigracionit, grupi parlamentar i partive CDU/CSU ka paraqitur dy mocione për Bundestagun, duke argumentuar pozitat e tij mbi këtë temë.
CDU/CSU kërkon një ndalim ‘de facto’ të hyrjes në Gjermani për të gjithë ata që nuk kanë dokumente të vlefshme për hyrje, përfshirë ata që përfitojnë nga liria e lëvizjes brenda BE-së, pavarësisht nëse kërkojnë azil.
Një nga kërkesat kryesore të CDU/CSU është që të zbatohet një masë e menjëhershme për “arrestimin dhe mbajtjen në paraburgim” të individëve që duhet të largohen nga Gjermania. Për këtë, ata kërkojnë rritjen e kapaciteteve të burgjeve në lande, si dhe përdorimin e objekteve të tjera, si kazermat dhe kontenierët e banimit, për të mbajtur këta persona. Gjithashtu, propozohet që Policia Federale të ketë kompetenca për të kërkuar urdhra arresti dhe paraburgim për ata që rezultojnë pa leje qëndrimi.
CDU/CSU gjithashtu kërkon ashpërsimin e të drejtës së qëndrimit për individët me rekorde kriminale dhe për ata që konsiderohen të rrezikshëm, duke përfshirë mbështetje më të madhe për landët gjermane për të realizuar dëbimet e përditshme.
Nga ana tjetër, SPD dhe të Gjelbërit kanë kundërshtuar disa nga pikat e mocioneve të CDU/CSU, duke i konsideruar ato jokushtetuese dhe në kundërshtim me ligjin e BE-së. CDU/CSU e kundërshtojnë këtë, duke argumentuar se ligji kombëtar mund të ketë përparësi ndaj ligjit evropian në situata emergjente.
Për miratimin e mocioneve, CDU/CSU kërkon mbështetje nga disa grupe të tjera, përfshirë FDP dhe BSË, pasi vetëm votat e AfD-së nuk janë të mjaftueshme për shumicën. Këto kërkesa janë nënshtruar për shkak të një sulmi vdekjeprurës të një afgani 28-vjeçar në Ashafenburg, që ka nxitur kërkesa për masa më të ashpra të kontrollit të migracionit dhe sigurisë.
