Instagram, që është në pronësi të Meta, po bën ndryshime të rëndësishme në mënyrën se si funksionon platforma dhe si rekomandon përmbajtje, duke u fokusuar sidomos tek promovimi i përmbajtjes origjinale dhe krijimi i një ambienti më të sigurt online për adoleshentët.
Së fundmi, në një postim Instagram njoftoi një ndryshim të madh në algoritmet e tij – një “rifillim nga e para.” Sipas postimit, platforma ka testuar “mundësinë për të gjithë përdoruesit – përfshirë adoleshentët – që të rivendosin rekomandimet e tyre. Me disa klikime, mund të fshini përmbajtjen e rekomanduar në Explore, Reels dhe Feed dhe të filloni nga e para.”
Ky funksion i ri ndërtohet mbi mjetet që Instagram tashmë ofron për të personalizuar rekomandimet e përmbajtjes. Nëse keni nevojë për një “pastrim” të timeline-it ose jeni lodhur nga përmbajtja e rekomanduar, ky rifillim do të ndihmojë në përshtatjen e rekomandimeve me kalimin e kohës.
Gjithashtu, do të keni mundësinë të shqyrtoni llogaritë që ndiqni dhe të ndaloni së ndjekuri ato që nuk dëshironi më t’i shihni, sipas postimit.
Megjithatë, Instagram thekson se ky rifillim nuk mund të zhbëhet pasi të jetë nisur. Funksioni i ri “rifillim nga e para” do të shpërndahet së shpejti globalisht.
Ky veprim vjen në një kohë kur Meta po përballet me presion të madh nga Kongresi dhe një numër të madh padish nga prokurorët e përgjithshëm të shteteve, të cilët e akuzojnë kompaninë për përkeqësimin e çështjeve të shëndetit mendor tek të rinjtë dhe krijimin e një ambienti online të varur.
