Reperi i njohur amerikan, Eminem, u ngjit në podiumin ku po fliste ish-presidenti Barack Obama, në kuadër të fushatës presidenciale.
Obama mblodhi në Michigan qindra mbështetës të Kamala Harrisit, për të treguar se cili është plani udhëheqës që synon të lehtësojë jetesën e amerikanëve, shkruan IndeksOnline.
Teksa Obama po mbante fjalim, ai i tha disa nga vargjet e Eminemit, i cili paraprakisht ndezi turmën.
“Jam këtu sonte për disa arsye të rëndësishme. Siç e dini shumica prej jush, qyteti i Detroitit dhe i gjithë shteti i Michiganit do të thotë shumë për mua. Duke hyrë në këto zgjedhje, qendra e vëmendjes është mbi ne më shumë se kurrë, dhe është e rëndësishme që ju të përdorni zërin tuaj, ndaj po i inkurajoj të gjithë të dalin dhe të votojnë. Unë gjithashtu mendoj se njerëzit nuk duhet të kenë frikë të shprehin mendimet e tyre dhe nuk mendoj se dikush dëshiron një Amerikë ku njerëzit shqetësohen për ndëshkimin ose se çfarë do të bëjnë njerëzit nëse thoni mendimin tuaj. Unë mendoj se zëvendëspresidentja Harris mbështet një të ardhme për këtë vend, ku këto liri dhe shumë të tjera do të mbrohen dhe ruhen. Dhe, këtu për t’ju thënë më shumë për këtë, jam krenar të prezantoj presidentin Barack Obama” u shpreh Eminem.
