Ujërat e përmbytjeve po vazhdojnë të rriten në pjesë të Gjermanisë jugore dhe tani po përhapen poshtë Danubit në Austri dhe Hungari.
Pesë persona tashmë janë konfirmuara të vdekur pasi shiu i madh çoi në daljen e lumenjve nga shtrati në Bavari dhe Baden-Württemberg.
Një nga viktimat ishte një grua që vdiq kur makina e saj doli nga rruga dhe u zhyt në perëndim të Mynihut.
Megjithëse shërbimi i motit gjerman DWD ka shpallur fundin e shiut të rrëmbyeshëm që ka goditur Gjermaninë jugore prej ditësh, nivelet e ujit në qytetin historik të Passau, ku takohen tre lumenj, tani janë rritur afër 10 metra, më i larti për më shumë se një dekadë.
Nivelet e lumenjve në Danub janë rritur gjithashtu në Austri dhe Hungari.
Danubi doli nga shtrati në qytetin e tretë më të madh të Austrisë, Linz, duke lënë të zhytura në ujë zonat afër brigjeve të lumit.
I gjithë trafiku lumor përgjatë Danubit u ndalua në zonën e Austrisë së Poshtme.
Në Hungari, sinoptikanët paralajmëruan për reshje të konsiderueshme shiu në tre ditët e ardhshme dhe Gabriella Siklos e Drejtorisë Kombëtare të Ujit paralajmëroi se situata po ndryshonte çdo orë.
Kishte gjithashtu shqetësime se nivelet në rritje të ujit do të përhapeshin në fushën e përmbytjes së Danubit në Sllovaki.
Transporti i mallrave mbetet i ndaluar në Rhine në disa zona të Gjermanisë jugore, megjithëse autoritetet në Baden-Württemberg në jugperëndim thonë se nivelet e ujit do të bien në ditët në vijim.
Shi i rrëmbyeshëm ka rënë prej ditësh në pjesën më të madhe të Gjermanisë jugore dhe është shpallur një gjendje e jashtëzakonshme në zonën Rosenheim të Bavarisë.
Tre persona kanë vdekur tani në Bavari dhe një burrë dhe një grua u gjetën të vdekur në bodrumin e tyre në Baden-Württemberg të hënën. Një zjarrfikës 22-vjeçar është zhdukur në Bavari.
Kryeministri i shtetit bavarez Markus Söder e ka përshkruar situatën si “serioze dhe kritike”.
Në disa zona të Gjermanisë jugore, ekspertët folën për nivele të reshjeve që ndodhin një herë në shekull.
Makinat u fshinë dhe zonat e banuara u përmbytën, megjithëse deri të martën në mëngjes të gjitha paralajmërimet e motit të keq në Gjermaninë jugore u hoqën.
Kancelari gjerman Olaf Scholz ka thënë se përmbytjet në jug janë një kujtesë se “ndalimi i ndryshimeve klimatike të shkaktuara nga njeriu” nuk mund të neglizhohet.
Sipas Shërbimit Gjerman të Motit (DWD), reshje të reja dhe stuhi të tjera priten në Bavari – por shi i madh ka të ngjarë vetëm në skajin lindor të Alpeve. Në Baden-Württemberg pritet të mbetet kryesisht i thatë të mërkurën.
