Parashikimet e OKB-së tregojnë se një në katër familje në Gaza, ose më shumë se gjysmë milioni njerëz, “po përballen me kushte katastrofike të karakterizuara nga mungesa e ushqimit”
Një në pesë gra shtatzëna të trajtuara në një klinikë qendrore të Gazës është e kequshqyer, kanë paralajmëruar mjekët. “Çdo ditë ne shohim gra dhe fëmijë që vijnë në klinikën tonë duke vuajtur nga kequshqyerja akute”, ka thënë dr. Maram, mjeke kryesore e “Project Hope”. Organizata jofitimprurëse ka thënë se 21% e grave shtatzëna të trajtuara në klinikën “Deir al Balah” në tri javët e fundit vuanin nga kequshqyerja, ashtu si një në 10 fëmijë. “Ndërsa sëmundjet infektive përhapen në zonat e mbipopulluara dhe ushqimi bëhet edhe më i rrallë, ne do të shohim gjithnjë e më shumë njerëz të uritur – përfshirë punonjësit shëndetësorë që po përpiqen të ndihmojnë. Unë shqetësohem çdo ditë se nuk do të gjej asgjë për të ngrënë”, ka thënë dr. Maram.
Vetëm një pikë ndihme po arrin në Gaza, edhe pasi OKB-ja paralajmëroi për “xhepat e urisë” dhe urinë e përhapur në të gjithë enklavën. Gjatë muajit të kaluar dërgesat kanë rënë me rreth gjysmën nga nivelet e janarit, në më pak se 100 kamionë në ditë mesatarisht, ose 2300 për të gjithë muajin. Parashikimet e OKB-së tregojnë se një në katër familje në Gaza, ose më shumë se gjysmë milioni njerëz, “po përballen me kushte katastrofike të karakterizuara nga mungesa e ushqimit”. Dy fëmijë vdiqën në spitalin “Kamal Adwan” në Gazën veriore nga kequshqyerja dhe dehidratimi, njoftuan autoritetet lokale shëndetësore më 27 shkurt.
Spitalet dhe punonjësit shëndetësorë janë prekur keq gjithashtu nga mungesat e ndihmës. Spitali “Al-Awda” në Jabalia, Gaza veriore, thuhet se pezulloi shërbimet mjekësore të mërkurën për shkak të mungesës së madhe të karburantit dhe furnizimeve mjekësore. Ishte spitali i fundit funksional në zonë, dhe një nga menaxherët e lartë, dr. Muhammad Salha, ka thënë se mbyllja e tij do të çonte në “një privim të plotë të shërbimeve shëndetësore bazë për qytetarët, veçanërisht në dritën e ndërprerjes së shërbimit nga të gjitha spitalet në veri”, raportoi Al Jazeera. Salha bëri thirrje urgjente për karburant dhe furnizime bazë mjekësore. Vetëm një e treta e spitaleve të Gazës janë pjesërisht funksionale, sipas shifrave të OKB-së, dhe ato që po operojnë janë të mbingarkuar me pacientë dhe me mungesë furnizimesh.
Zjarret shpërthyen gjithashtu në spitalin “Nasser” të mërkurën pas sulmeve izraelite. Spitali më i madh në Gazën jugore nuk funksionon më, por ende ka 120 pacientë që presin evakuimin mjekësor. Ndërtesa e spitalit ka nevojë për riparime urgjente për të rikthyer energjinë dhe ujin, dhe për t’u marrë me asgjësimin e ujërave të zeza dhe mbetjeve të ngurta. OKB-ja dhe organizatat humanitare thonë se pengesat logjistike, duke përfshirë kufizimet e lëvizjes, inspektimet kufitare dhe mbylljen e kalimeve, si dhe ngrirja e vizave për shumë anëtarë të personelit, pengojnë përpjekjet për të marrë ndihma në Gaza. “Mund të duhet deri në një muaj që furnizimet të hyjnë në Gaza, sepse çdo kuti në çdo kamion i nënshtrohet ekzaminimit”, ka thënë Médecins Sans Frontières këtë javë. Autoritetet izraelite e kthejnë mbrapsht një ngarkesë të tërë nëse një artikull i vetëm refuzohet gjatë kontrollit, ndonëse nuk kanë ofruar një listë të artikujve të kufizuar.
Izraeli thotë se nuk po i kufizon dërgesat e ndihmave. Ai fajëson agjencitë humanitare për dështimin për të marrë më shumë furnizime në territor pasi nisi sulmet në përgjigje të sulmeve të 7 tetorit nga Hamasi, në të cilat u vranë 1200 njerëz dhe 200 të tjerë u morën peng. Numri i të vdekurve palestinezë nga sulmet izraelite arriti në 29.954 të mërkurën, shumica prej tyre gra dhe fëmijë, kanë thënë autoritetet shëndetësore në Gaza
Udhëheqësi i Hamasit, Ismail Haniyeh, në një fjalim televiziv nga Bejruti u bëri thirrje palestinezëve të marshojnë drejt xhamisë “Al-Aksa” në Jerusalem për të shënuar fillimin e Ramazanit më 10 mars dhe i bëri thirrje “boshtit të rezistencës” – aleatëve iranianë duke përfshirë Hezbollahun e Libanit, Huthit e Jemenit dhe Rezistencën Islamike në Irak – për të rritur përpjekjet në emër të popullit të Gazës. Thirrjet kanë shtuar shqetësimet për përleshje përtej Gazës gjatë Ramazanit, nëse sulmet izraelite vazhdojnë.
Presidenti amerikan, Joe Biden, ka thënë në fillim të kësaj jave se një marrëveshje armëpushimi mund të arrihet përpara Ramazanit, por Izraeli dhe Hamasi i kanë minimizuar shpresat e tilla, derisa ndërmjetësit e Katarit kanë bërë të ditur se ka ende dallime të mëdha. Netanyahu është nën presionin e brendshëm në rritje për të arritur një marrëveshje për lirimin e pengjeve, por ka thënë se nuk do ta përfundojë fushatën ushtarake derisa Izraeli të ketë arritur “fitoren totale”. Bideni e ka paralajmëruar vazhdimisht Netanyahun kundër një ofensive tokësore në Rafah, ku më shumë se 1.5 milionë njerëz kanë kërkuar strehim, përveç nëse ka një plan të besueshëm për të mbrojtur civilët. Fraksionet politike palestineze do të takohen të enjten në Moskë për të diskutuar një qeveri të mundshme uniteti dhe rindërtimin e Gazës, disa ditë pasi kryeministri palestinez, Mohammad Shtayyeh, dha dorëheqjen, duke thënë se ishte koha për një qasje të re gjithëpërfshirëse. Ministri i Jashtëm, Riyad al-Maliki, ka thënë se nuk priste “mrekulli” në bisedimet, të cilat do të bashkojnë zyrtarë nga Hamasi dhe Fatah-u, i cili qeveris në Bregun Perëndimor. (The Guardian)
