Ndërkohë që TikTok-u po bën namin, të famshmit shqiptarë po rikthejnë një trend që ndonëse gjenerata Z ndoshta e ka harruar, vijon të jetë prezent, i thjeshtë dhe fitimprurës. Duke nisur që nga Agron Llakaj, Albana Osmani, Bledi Strakosha, Isli Islami e deri tek Elvis Pupa, Fjoralba Ponari dhe Alketa Vejsiu, të gjithë po i inkurajojnë njerëzit që t’i ndjekin projektet e tyre në kanalet përkatëse në YouTube.
Personazhet e njohur i janë drejtuar platformës për projekte që i lejojnë të kenë një qasje më personale ndaj publikut, si dhe kontroll mbi financat dhe përshtypjet që audienca ka.
Agron Llakaj, në një intervistë për “Aldo Morning Show”, tregoi se do të ketë një kanal të ri në YouTube, duke thënë: “Jemi duke u përgatitur për një “Al Pazar” të vogël, të cilit ende s’ia kemi vendosur emrin. Po bëjmë një rikthim, me një staf të reduktuar. Në bazë do të ketë humorin”, tha aktori i humorit.
“Në qoftë se do ta kesh kohën sepse vetë gjatësia e materialit është diku te 38-40 minuta që nuk e ka komoditetin çdokush të të ndjekë, ka qëllimin e coëptimit të pjesëzave të cilat krijojnë interesin apo intrigën e atij që të ndjek. Me këtë qëllim po e realizoj, duke e materializuar në kanalin e Youtube, ajo automatikisht pastaj nëpërmjet mjeshtrave të letrës, kalon duke u bërë një libër”, u shpreh ai.
Albana Osmani gjithashtu ka publikuar një postim në Instagram, ku njofton njerëzit që ta ndjekin në YouTube. “Kërkoj të më bëni subscribe në kanalin tim në YouTube, sepse sa më shumë të mblidhemi aty, aq më shumë gjëra të bukura do të jetojmë së bashku”, u shpreh.
Bledi Strakosha është një tjetër emër që i është bashkuar “trendit” dhe njofton ndjekësit që të shohin të rejat që ai sjell në kanalin në YouTube.
Edhe Isli Islami do të bëjë një emision të ri, të emëruar “n’AUDI”.
Alketa Vejsiu, gjithashtu, përmes podkastit “Inspire” nga revista Class, fton ndjekësit ta dëgjojnë në YouTube.
Elvis Pupa ka një kanal në YouTube ku bën skeçe humori, fton njerëz të ndryshëm, ndan përvoja me të shoqen, si dhe ka realizuar edhe një emison.
Moderatorja Fjoralba Ponari ndan përmes vlog-eve në YouTube copëza të ndryshme rrëfimesh, si dhe udhëtimesh, si ai në Japoni dhe rishtazi në Romë.
Por, pse të gjithë janë fiksuar me projektet në YouTube?
– YouTube është një rrjet social shumë i përhapur dhe i përdorur. Për disa njerëz është mënyrë e shpejtë për të bërë para, ndërsa për disa të tjerë mund të lidhet me pasionin për të treguar përditshmërinë, për të frymëzuar, apo për të ndërgjegjësuar dhe inkurajuar ndjekësit. Cilado qoftë arsyeja, sërish YouTube të shpërblen në aspektin monetar.
– Shikimi i videove online është një praktikë kaq e përhapur, ndaj me shumë gjasa ke parë shumë njerëz të famshëm në TikTok që ftojnë ndjekësit dhe jo vetëm që t’i shohin videot e tyre në reels-at e Instagram-it, ose në YouTube. Në këtë të fundit, qarkullojnë miliarda video dhe vetë platforma ka rreth 4 miliardë shikime përditë.
Pra, YouTube e bën shumë të thjeshtë që personat e famshëm të shkojnë tek audienca, duke krijuar video, si dhe promovon kreativitetin dhe punën e krijuesve të kontentit.
– YouTube është i renditur gjithashtu në pjesën e “Videos” në kërkimin që ne kryejmë në Google, çka e bën edhe më të thjeshtë kërkimin e njerëzve dhe gjetjen e videove të personazheve të famshëm. Mund ta keni vënë re se videot shfaqen shpesh në kërkimin që bëni në Google, pra vetë Google e percepton të rëndësishëm shikimin dhe klikimin e tyre.
– Një tjetër arsye është qasja që një artist ose krijues kontenti do të ketë tek audienca. Moderatorë e humoristë të ndryshëm janë “të detyruar” që të ndjekin një skaletë e një skenar, ndërsa në YouTube shfaqen në mënyrë më të afërt, pa një minutazh të caktuar dhe mund të ndajnë rrëfime personale me publikun. Videot dhe projektet në YouTube mundësojnë një frymë të re dhe një raport më të ngushtë mes të famshmëve dhe ndjekësve të tyre.
Siç mund ta kesh vënë re, zakonisht, personazhet e famshëm e kanë emrin e kanalit në YouTube me emrin e vet, pra jo me nofka. Kjo, sepse është e rëndësishme që YouTube të lidhet edhe me kanale të tjera, si Instagram apo TikTok. Duke qenë se këta njerëz njihen nga publiku, është më mirë që kanalet në YouTube t’i kenë me emrin e tyre.
– Përmes YouTube-t “eksperimentojnë” me atë që duan t’i japin audiencës. Klikimet në YouTube dhe komentet nëpër video e bëjnë shumë më të lehtë që personazhet publikë të njohin audiencën dhe të dinë se ç’t’i ofrojnë asaj. Kështu, mund të eksperimentojnë, ta dinë se ç’pëlqejnë ndjekësit dhe t’ua ofrojnë.
