Platforma YouTube ka publikuar video me udhëzime për dhënien e ndihmës së parë.
Përveç shumë videove me udhëzime për çështje të ndryshme platforma publikoi udhëzimin për ndihmën e parë në mënyrë që njerëzit të kenë qasje të shpejtë në të kur të ju duhet, shkruan CNN.
YouTube ka bashkëpunuar me organizata shëndetësore të mëdha për t’i krijuar sa më mirë videot udhëzuese për ndihmën e parë bazë dhe kujdesin urgjent.
Tani aty mund të gjenden udhëzimet e dhënies së ndihmës së parë për frymëmarrje, ngufatje, gjakderdhje, sulm në zemër e mbidozë nga opiumet e ndryshme.
Ky mision i gjigandit YouTube ka filluar me qëllimin që gjithkush në mbarë botën të mund të ketë qasje në informata të sakta e kualitative të kujdesit shëndetësor.
Kjo nismë ka bërë që të shtohen informata të sakta nga institucionet e ndryshme shëndetësore për të ndihmuar në identifikimin e videove të krijuara nga profesionistët mjekësorë.
Platforma që nga themelimi i saj në vitin 2005 është e para që njerëzit i qasen kur duan të marrin informata se si duhet të bëjnë ndonjë gjë të caktuar.
