Sipas informacioneve të fundit, Kina është bërë eksportuesja më e madhe në botë e veturave, duke kaluar Japoninë me gati një milion automjete më shumë. Suksesi më i madh i industrisë kineze të veturave është padyshim marka BYD.
Vlerësimet e fundit tregojnë se Japonia do të eksportojë 4.3 milionë automjete në vitin 2023. Kjo nuk mjaftoi që Japonia të mbetej eksportuesi më i madh i veturave, por froni iu dorëzua Kinës. Sipas të dhënave të fundit, Kina eksportoi 5.26 milionë automjete, duke e bërë atë eksportuesin më të madh të veturave në botë. Ky informacion është edhe më interesant, duke pasur parasysh se ky vend aziatik e ka arritur këtë shifër pa shitur apo eksportuar asnjë veturë në Shtetet e Bashkuara të Amerikës, shkruan Autoblog.
Kina eksportoi më së shumti në tregjet në zhvillim, si Rusia dhe Meksika, por një pjesë e mirë e veturave u tregtuan edhe në Evropë, ku bënë bujën më të madhe të tregut. Në Kinë, shitjet e veturave elektrike u rritën me 21%, dhe shitjet e veturave hibride plug-in me 83%.
Pa dyshim, marka më e suksesshme në Kinë është BYD. Vitin e kaluar, kjo kompani shiti 3.024.417 automjete dhe hyri për herë të parë në 10 prodhuesit më të mirë të veturave në botë. Meqenëse BYD nuk do të prodhojë vetura me motorë me djegie të brendshme nga viti 2022, nga kjo shifër, rreth 1.57 milionë vetura ishin thjesht elektrike, ndërsa pjesa tjetër hibride. Suksesi për BYD është edhe më i madh, sepse në tremujorin e fundit të vitit të kaluar, gjiganti kinez ia kaloi Teslas për sa i përket shitjeve të automjeteve me bateri.
Marka e dytë më e suksesshme kineze në vitin 2023 ishte Chery me 1.88 milionë vetura të prodhuara, ndërsa e treta ishte Gely me 1.62 milionë.
