Megjithëse ekipi i Britney Spears thuhet se tashmë ka filluar të kërkojë kantautorë dhe muzikantë për albumin e saj të 10-të, ylli këmbëngul se nuk ka në plan të dalë sërish në skenë.
Këngëtarja e estradës ka bërë një postim në llogarinë personale në Instagram dhe ka bërë të qartë se asnjë nga këto thashetheme nuk është e vërtetë. “Për të qenë të qartë, shumica e lajmeve janë mbeturina. Ata vazhdojnë të thonë se po u drejtohem njerëzve të rastësishëm për të bërë një album të ri. Nuk do të kthehem kurrë në biznesin e muzikës”, ka shkruar ajo në postimin e saj.
Më pas artistja shtoi: “Kur shkruaj, shkruaj për qejf ose shkruaj për të tjerët. Për ju që keni lexuar librin tim, ka shumë gjëra që nuk dini për mua.”
Megjithatë, ajo tregoi se edhe pse nuk do të hyjë më në studio, në dy vitet e fundit ka shkruar më shumë se 20 këngë për të tjera. “Unë jam një tekstshkruese fantazmë dhe më pëlqen shumë”, shpjegoi Britney.
