Vëllai i viktimës Liridona Ademaj, Leonard Ademaj, pas konferencës për medie të Prokurorisë Themelore në Prishtinë, ku u bë e ditur ngritja e aktakuzës ndaj Naim Murselit dhe tre të tjerëve, tha se e mirëpresin ngritjen e aktakuzës, ndërsa presin dënim kapital për të akuzuarit.
“Në emër të familjes ju falënderojmë të gjithëve, e falënderojmë edhe prokurorinë dhe hetuesinë. Ne kemi besuar në drejtësi dhe vazhdojmë të besojmë. Ajo çfarë duam ne është që gjykata sa më shpejt të vendosë një dënim kapital që të lehtësojë zemrat tona sado pak dhe fëmijëve të saj”, tha Ademaj, raporton “Betimi për Drejtësi“.
Ai theksoi se aktakuzën nuk e kanë pranuar ende dhe se nuk e dinë se cili është motivi, teksa theksoi se takohen me fëmijët dhe se ata kanë kuptuar gjithçka.
