Forcat izraelite kanë vazhduar bombardimet në Rripin e Gazës, duke vrarë të paktën nëntë persona në orët e para të mëngjesit të kësaj të diele. Shtatë nga viktimat u regjistruan në një sulm ajror ndaj një shtëpie në Jabalia an-Nazla, në veri të territorit, shkruan Gazeta sinjali.
Sipas një mjeku në Gaza, situata humanitare po përkeqësohet me shpejtësi, duke hyrë në një “fazë të re vdekshmërie” për shkak të urisë. Ai tha se tashmë fëmijët e shëndetshëm, pa sëmundje të mëparshme, po preken rëndë. Një fëmijë 4-vjeçar ka humbur jetën si pasojë e kequshqyerjes.
Ndërkohë, grupet franceze dhe palestineze për të drejtat e njeriut kanë ndërmarrë një hap ligjor për të ndaluar tetë kompani izraelite armësh nga pjesëmarrja në Panairin Ajror të Parisit, për shkak të përdorimit të armëve në sulme ndaj civilëve palestinezë.
