Dua Lipa është në kopertinën e Time, ku u shpall edhe një ndër 100 njerëzit me më shumë ndikim në botë. Në këtë intervistë, ajo ka folur për gjithçka, duke nisur që nga manifestimi i ëndrrave të saj, deri te krenaria për rrënjët e saj.
Dua tha ndër të tjera se qysh prej fëmijërisë, ajo ka shkruar gjërat që ka ëndërruar për veten. “Që kur kam qenë fëmijë, kam shënuar gjërat që kam ëndërruar për vetën time. Gjithnjë kam planifikuar më përpara. Edhe pse lindin surpriza rrugës, unë i vlerësoj në këtë moment, gjithmonë kam një objektiv afatgjatë”.
Ylli i popit ka një karrierë mjaft të suksesshme dhe theksoi se është e rëndësishme që t’i shkruash gjërat. “Asnjëherë nuk e di se çfarë mund të realizohet”, tha Dua.
A beson Dua te fuqia e manifestimit? Patjetër që po! Madje, manifestimi është një gjë shumë e rëndësishme për të. “Unë kam shumë besim me gjërat që vendos në këtë botë. Në mënyrë të pavetëdijshme, ti punon për të. Asgjë nuk është shumë e madhe”, tha ajo.
Dua Lipa lindi në Londër në vitin 1995, nga Anesa dhe Dukagjini, të cilët u larguan si refugjatë në vitet ’90. Kur Dua ishte 11 vjeç, ata u rikthyen në Kosovë dhe më pas, Dua u rikthye në Londër, për të ndjekur karrierën e saj muzikore.
Dua foli me shumë pasion edhe për rrënjët e saj dhe kulturën shqiptare. “Jam nga dy vende në të njëjtën kohë. Të jem kosovare është një pjesë shumë e rëndësishme dhe fakti që mora nënshtetësinë shqiptare ka qenë shumë emocionues”, tha Dua, referuar marrjes së nënshtetësisë shqiptare në vitin 2022.
Ajo foli gjerësisht për Kosovën, duke theksuar se është ndër popullsitë që ka moshën më të re në Europë. “Mundësia për të udhëtuar lirisht është shumë e rëndësishme. Ne kemi qenë fëmijë me ëndrra dhe shpresa të mëdha dhe donim të udhëtonim rreth e qark botës dhe të eksploronim. Ata duan të përparojnë, të rriten dhe të shpresojnë se mund të dëgjohen në mënyra të tjera. Tani që pasaporta e tyre ka vlerë është diçka shumë e mirë”.
Dua shtoi se kur flitet për Kosovën, nuk ka dëshirë t’i referohen si një vendi që ka përjetuar luftën, por është shumë më tepër. “Kur unë dhe im atë bëjmë festivalin në Prishtinë, sjellim njerëzit nga e gjithë bota dhe ata vijnë dhe shohin që gjërat janë ndryshe nga ç’e presin”, u shpreh ajo, duke përfshirë edhe artistët dhe admiruesit e muzikës.
