Festivali i Dua Lipës synon të ndryshojë imazhin e Kosovës”, është titulli i një artikulli qe BBC i ka kushtuar festivalin që u mbajt për katër net në Prishtinë, duke i dhënë gjallëri gjithë vendit.
BBC shkruan se në Britaninë e Madhe përgjatë verës ka festivale çdo javë diku, ndërsa shton se në disa pjesë të botës nuk ka mundësi që të vallëzosh me bashkëshortin duke mbajtur një birrë në dorë.
“Në disa pjesë të botës nuk ka asnjë mundësi për të kërcyer me bashkëshortët tuaj në një fushë duke mbajtur një birrë të vakët, duke u përballur me shampon e thatë, sinjalin e dobët të telefonit dhe thirrjet “Oggy, oggy, oggy, oi, oi, oi”.
Sipas BBC-së këtu ka qenë pika ku Dua Lipa dhe babai i saj Dukagjini kanë dashur të ndryshojnë gjërat duke e lansuar festivalin Sunny Hill në vendlindje, Kosovë.
“Dua të ndryshoj retorikën e asaj që njerëzit mendojnë për Kosovën dhe se ajo është e shkatërruar nga lufta”, shpjegoi Dua në fillim të këtij viti.
“Kur isha duke jetuar në Kosovë, asnjë nga artistët që unë doja t’i shihja nuk vinte.”
Dua kishte lindur në Britani por shkoi në Prishtinë si fëmijë pas një lufte në fund të viteve 1990 që la më shumë se 10 mijë të vdekur, ndërsa Kosova po luftonte për pavarësi nga Serbia.
Pavarësia u shpall më 2008, edhe pse disa vende – përfshirë Serbinë- refuzuan ta njohin atë.
“Rivendosja e vendit mori më shumë vite nga sa do të donim,” thotë Dukagjin Lipa.
Ai thotë se ishte “gjithmonë një ëndërr” të kishte diçka si Sunny Hill në Prishtinë, pasi kishte punuar në industrinë e ngjarjeve të muzikës live për vite përpara se Dua të bëhej një yll ndërkombëtar i popit.
Në vitin 2018, 10 vjet pasi Kosova shpalli pavarësinë, u lansua Sunny Hill. Por atëherë ishte më e vështirë të bindeshin artistë të tjerë botërorë që të luanin dhe vitin e ardhshëm ylli i Neë Rules iu drejtua miqve të saj Miley Cyrus dhe Calvin Harris, të cilët të dy performuan në rajon për herë të parë.
Kjo ndryshoi mënyrën se si festivali u pa nga aktet e tjera dhe ekipet e tyre menaxhuese.
“Ne me të vërtetë ia dalim kur bëhet fjalë për ‘line up’”, tha Dukagjini për BBC News.
“Kur flas me artistët për ardhjen, them: “Shiko, mund të mos kesh tekilën që dëshiron, por më beso se do të kesh pajisjet më të mira të zërit që mund të blejnë paratë”.
