Pas daljes nga “Big Brother VIP 4”, Valbona Mhilli ka qenë e ftuar në emisionin “Mos i bjer me top” me Ronaldo Sharkën, ku nuk ka nguruar të flasë për debatet e hapura jashtë shtëpisë, përfshirë edhe përplasjen me opinionisten Shqipe Hysenaj.
Ndërkohë që Valbona ishte brenda shtëpisë, në “Fan Club” u hodhën akuza nga Shqipja, e cila deklaroi se ajo kishte lënë një lidhje jashtë. Kjo deklaratë ndezi reagime të shumta në media, por Valbona e ka mohuar kategorikisht, duke theksuar se nuk ka asgjë për të fshehur.
E pyetur nëse ka ndërmend të ndërmarrë veprime ligjore, Valbona u shpreh se: “Jo nuk është se do ta hedh në gjyq Shqipen, për të vetmen arsye se unë ato çfarë kisha për t’ja thënë ja thashë në sy, në ‘Fan Club’. Madje e kam ftuar që nëse ka foto, fakte për këtë lidhjen imagjinare që vetëm Shqipja e di se ku ka ekzistuar dhe ku ekziston ky personi në fjalë”.
Ajo shtoi se, ndonëse e ka marrë me sportivitet, situata ka qenë e vështirë për familjarët e saj:
“Kohët e fundit e mora me shumë sportivitet, ama një stres shumë i madh për familjarët e mi të cilët iu ushtrohej një lloj presioni”.
Për Valbonën, tema tashmë është e mbyllur, ndërsa thekson se familja e saj është gjithmonë në dijeni të çdo gjëje që ndodh në jetën e saj personale.
“Unë jam një libër i hapur dhe kam një marrëdhënie të shkëlqyer me vëllezërit e mi, me motrën dhe mamanë time. Ato dinë çdo gjë në jetën time dhe raportet e mia kanë qenë gjithmonë diskutim mes motrës dhe vëllezërve”.
Në këtë mënyrë, Valbona e ka vendosur të mos ndjekë rrugën ligjore, por i ka dhënë një përgjigje të drejtpërdrejtë publike akuzave që u hodhën ndaj saj.
